Me një njoftim zyrtar, Presidenti ka shpallur se aplikimet për funksionin e Guvernatorit do të pranohen deri më 5 tetor dhe do ruhet konfidencialiteti i plotë i procesit
Një ditë pas shkarkimit të Ardian Fullanit, institucioni i Presidencës hap procedurat për emërimin e Guvernatorit të ri. Në funksion të këtij procesi, Presidenti fton të gjithë shtetasit shqiptarë, qoftë dhe nga dispora, që deri më 5 tetor 2014 të shprehin interesin për postin shoqëruar me dokumentacionin përkatës të përcaktuar në ligjin për Bankën e Shqipërisë. Presidenca ka njoftuar se pas vendimit të djeshëm të shkarkimit të Guvernatorit të Bankës së Shqipërisë nga ana e Kuvendit të Shqipërisë, fillon procedura e emërimit të Guvernatorit të ri. “Për këtë qëllim, Presidenti fton të gjithë shtetasit shqiptarë dhe shqiptare si dhe ata nga diaspora të shprehin interesin e tyre pranë Presidentit të Republikës. Kandidaturat duhet të plotësojnë kushtet dhe kriteret e përcaktuara në Ligjin nr. 8269, datë 23.12.1997 “Për Bankën e Shqipërisë”, i ndryshuar.” Presidenca ka garantuar çdo të interesuar se aplikimet do të mbeten konfidenciale. Çdo i interesuar mund të aplikojë dhe kontaktojë në adresën [email protected]. Shprehja e interesit nga çdo i interesuar duhet të shoqërohet me dokumentacion të skanuar dhe aplikimet do të vijojnë deri më datë 5 tetor 2014. Kriteret që duhet të plotësojë një kandidat Po kush mund të jetë kandidat për të tentuar të marr firmën e kreut te shtetit. Nëni 44 pika 3, e ligjit për “Bankën e Shqipërisë” e sanksionon qartë. “Kandidatët për anëtarë të Këshillit Mbikëqyrës duhet të jenë shtetas të Republikës së Shqipërisë, persona që gëzojnë ndershmërinë dhe pastërtinë morale,si dhe kanë : a) arsimin e lartë ekonomik ose juridik; b) përvojë profesionale në çështje financiare dhe bankare; c) kualifikime profesionale të profilit; ç) përvojë pune mbi pesë vjet në administratën publike ose në institucionet financiare dhe bankare; d) të mos kenë pengesa të parashikuar në nenin 47″ Por kush janë pengesat që parashikon nëeni 47: ” Çdo anëtar i Këshillit Mbikëqyrës, duke përfshirë guvernatorin dhe zëvendësguvernatorët pezullohet nga detyra nga Këshilli i Ministrave dhe shkarkohet nga Kuvendi Popullor, në qoftë se ai ose ajo: a) është në pamundësi për të shërbyer në Këshillin Mbikëqyrës të Bankës së Shqipërisë, sipas nenit 46; b) është dënuar nga gjykata për një vepër penale, për të cilën ligji parashikon dënimin me burgim; c) është në pamundësi për të paguar detyrimet monetare ose është deklaruar I falimentuar dhe nuk është rehabilituar; ç) është ndaluar ose pezulluar nga gjykata të ushtrojë detyrën si nëpunës shtetëror apo në shërbimin publik ose të ushtrojë veprimtarinë apo mjeshtërinë; d) gjatë ushtrimit të detyrës, në mënyrë aktive merr pjesë në veprimtari politike” Kushtetuta e Shqipërisë në nenin 161 mandaton presidentin e republikës për ti propozur parlamentit emrin e guvernatorit të ri. Të gjith kandidatët e interesuar mund të aplikojnë online në adresën e e-mailit [email protected]. Ndërkohë edhe ambasadori Amerikan, Aleksandër Arvizu zhvilloi sot një takim prej 60 minutash me Presidentin, Bujar Nishani. Mësohet se takimi u mbajt në ambientet e Presidencës, ndërsa tema e takimit ka qenë zgjedhja e Guvernatorit të ri, kompetencë kjo e kreut të Shtetit. Fill pas miratimit të vendimin nga Parlament, për shkarkimin e Ardian Fullanit nga posti i Guvernatorit të Bankës së Shqipërisë, pas skandalit të vjedhjes nga Thesari i Shtetit të 713 milion lekëve, erdhi dhe kjo masë. Ndërkohë, në deklaratat e tij të mëparshme, Ambasadori Arvizu pa shprehur qëndrimin e tij sa i takon zgjedhjes së Guvernatorit, duke theksuar se ai duhet të jetë jashtë skenës së politikës. Ndërkohë, po sot, Arvizu ka zhvilluar një takim me Ministrin e Punëve të Jashtme, Ditmir Bushatin, ndërsa nuk dihet tema e takimit.
