Profesori i shkencave Islame, Xhabir Hamiti, ka thënë se mosvotimi ose votimi kundër pranimit të Kosovës në UNESCO nga disa vende myslimane, ka ndodhur për faktin se ato vende janë shumë të lidhura me shtetin e Serbisë dhe kanë marrëdhënie shumë të mira diplomatike. “Ka shumë vende që nuk e dinë ku është Kosova, sepse nuk i është dhënë hapësirë”, tha ai.
Ai tha se edhe lobi i kishës ortodokse ishte shumë i fuqishëm dhe i mobilizuar kundër pranimit të Kosovës në agjencinë e Kombeve të Bashkuara.
“Përkatësia fetare është e rëndësishme tek popujt dhe kjo është parë te mobilizimi i Kishës ortodokse serbe dhe te ajo e Rusisë”, tha Hamiti në “Zona B” të Klan Kosovës.
“Vendet islamike kanë pasur marrëdhënie të shkëlqyera me Serbinë dhe vazhdojnë të kenë. Momentalisht të gjitha ambasadat e ish-Jugosllavisë janë aktive, ashtu siç kanë qenë në funksion edhe më parë”, tha ai.
“Si në Indonezi, Arabi Saudite, Malajzi. P.sh., Indonezia ka mbajtur një takim me krerët serbë dhe kanë thënë se nuk do ta votojnë dhe do të ndikojnë për kundër”, tha Hamiti.
Ndërsa për votimin kundër të Palestinës, profesori i shkencave islame ka pasur një shpjegim interesant.
“Palestina konsiderojnë se vota kundër Kosovës është edhe kundër SHBA-së mendoj që është kjo arsyeja e votës kundër të Palestinës dhe vendeve islame”, tha ai.
Hamiti ka deklaruar se shtetet nuk e shikojnë shumë fenë kur vije interesi i caktuar shtetëror.
Ai tha se diplomacia kosovare ka bërë shumë pak për prezantimin e Kosovës në atë pjesë të botës, përkundër Serbisë.
“Jam befasuar kur e kam pa listën e vendeve të konferencës islamike që fillimisht kanë qenë pro Kosovës e më pas kanë votuar kundër. Por kur hyra të hulumtoj të shoh se sa përfaqësi diplomatike kemi në vendet islame e gjeta një prehje. Ndërsa Serbia i ka rreth 18 ambasada në atë rajon”, tha ai.
“Dihet se ndikimi i Arabisë Saudite në Gadushillin Arabik është i madh dhe nëse ajo nuk do të kishte votuar as vendet e Gadishullit nuk do të kishin votuar”.
“Në aspektin politik janë krerët e shtetit që marrin vendim përfundimtar dhe kur vije në pyetje interesi nuk shikojnë fe nuk shikojnë besim dhe votojnë në bazë të interesit, kjo ndodhi edhe sot. Ka shumë vende që nuk e dinë ku është Kosova, sepse nuk i është dhënë hapësirë”, tha Hamiti.
