Me një manifestim të veçantë, nga ky vit si Ditë e Komunës së Gostivarit u shënua 29 Qershori, kur për herë të parë me 29 Qershor të vitit 1992, u formua Kuvendi Komunal i Komunës së Gostivarit.
Në ceremoni morën pjesë kryetari aktual i komunës së Gostivarit, Nevzat Bejta, kryetari i Këshillit Komunal, Nasir Musliu, kryetari i parë i komunës i zgjedhur në zgjedhjet shumë partiake, Enver Zenku, nënkryetari i parë, Nasir Selimi, këshilltarët komunal që nga përbërja e parë e deri më tani, Zëvendëskryeministri i Qeverisë së Republikës së Maqedonisë, Musa Xhaferri, Ministri i Drejtësisë, Adnan Jashari, i Arsimit dhe Shkencës, Abdilaqim Ademi, i Vetëqeverisjes Lokale, Lirim Shabani, Ministri Pa Resor, Furhan Çako, Muftiu i BFI-së në Gostivar, Shaqir Fetahu, deputet e zonës, si dhe shumë drejtues të institucioneve lokale dhe qendrore.
Kryetari i Komunës së Gostivarit, çmimin “Qytetar Nderi” ia ndau z. Branko Manajlloskit, ku thuhet “TI JE KRENARIA E KOMBIT, SEPSE ME VEPËRN TËNDE KORRIGJOVE FAQET E HISOTORISË.
“Në emrin tim si kryetar, në emrin e të punësuarve dhe në emrin e gjithë qytetarëve, në qytetin tonë shpallim “Qytetar Nderi” i vitit 2014, Mixhën Branko, njeriu i cili e donë natyrën, njeriu i cili e donë njerëzinë, njeriu i cili e donë gjuhën dhe kombin e vetë, njeriu që e donë flamurin e vet. Ne Mixhës Branko në emër të gjithë qytetarëve ia japim “Çelësin e qytetit të Gostivarit”, tha Nevzat Bejta kryetar i komunës së Gostivarit.
Në fjalën e tij, Branko Manajlloski i emocionuar tha: “Me nder qofshi, shumë bukur është. Bukuria e madhe është se rekan ma dha atë. Me nder qofshi të gjithë, shumë llafe nuk di se çfarë thotë zemra e shpirti nuk mund ti thuash me gojë, Me nder qofshi Zoti edhe juve u gëzoftë”, tha Manajlloski.
Manifestimi për Ditën e Komunës vazhdoi me prezantimin e punëve të realizuara gjatë periudhës Prill 2013 – Qershor 2014, ndërsa më pas foli kryetari i komunës së Gostivarit, Nevzat Bejta.
“Pas 22 viteve demokraci, qytetarët e Gostivarit e festojnë 29 Qershorin e vitit 1992, si ditë e komunës, sepse në këtë ditë është bërë kthesë e madhe në shoqërinë shqiptare, maqedonase, turke dhe në përgjithësi në shoqërinë tonë, për shkak se për herë të parë qytetarët me votën e lirë zgjodhën këshilltarët dhe kryetarin e parë të demokracisë, pluralizmit dhe njerëzisë. Sot një vit pas marrjes së detyrës, ne dalim para qytetarëve për të treguar për punët që kemi bërë, për të thënë se atë që kemi premtuar jemi duke e realizuar. Komuna ka qenë e hapur për çdo qytetar, pa marrë parasysh përkatësisë etnike, apo fetare, i kemi dëgjuar hallet dhe kërkesat e mbi 4 mijë qytetarëve dhe u kemi ndihmuar aty kemi pasur mundësi dhe gjithnjë do jemi në shërbimin e tyre. Ne kemi punuar që t’ju dalim në krye të gjitha premtimeve të dhëna para qytetarëve, për ta realizuar programin e premtuar. Kemi bërë reforma të mëdha në gjitha sferat që ne menaxhojmë, urbanizëm, arsim, kulturë, sport, dhe sferat tjera. Për një vit, ne kemi realizuar shumë prej punëve të premtuara të cilat ishin pjesë e programit tonë dhe që ishin kërkesa të qytetarëve. Reformat janë të vështira dhe nuk janë të lehta, por reformat i kërkojnë qytetarët dhe ata bëhen për interesat e shoqërisë tonë”, tha në fjalimin e tij Bejta duke thënë se Bashkë do vazhdojmë të punojmë në interes të shoqërisë, bashkë do ta ndërtojmë qytetin tonë, për të larguar injorancën, varfërinë dhe përçarjen, se vetëm në këtë mënyrë Bashkë mund të shkojmë përpara.
Para të pranishmëve fjalën e mori edhe kryetari i parë i komunës së Gostivarit, Enver Zenku i cili falënderoi këshilltarët komunal dhe kryetarin e komunës, Nevzat Bejta të cilët e bënë 29 Qershorin si datë të Ditës së komunës. Zenku gjithashtu foli edhe për sfidat dhe për vështirësitë me të cilat është përballur ai si kryetar komune në periudhën që ka drejtuar komunën e Gostivarit.
“Me takon një përshëndetje, një mirënjohje të garniturës së këshilltarëve të tashëm aktual të komunës së Gostivarit, kryesinë e kryetarit aktual Nevzat Bejta që për herë të parë i thanë PO demokracisë, për votimin e datës së 29 Qershorit, datës së parë të konstituimit të Kuvendit të parë të pluralist politik në komunën e Gostivarit. Kur jemi me rastin e konstituimit, unë do të përmendi disa fjali më kryesore. Në vitin 1991 u zhvilluan zgjedhjet e para të lira pluraliste në Maqedoni dhe në ato zgjedhje ne i fituam zgjedhjet Partia për Prosperitet Demokratik dhe kishte dy këshilltarë Partia Popullore. Mirëpo, përkundër asaj se ne kishim 38 këshilltar dhe vetëm 10 ishin të nacionaliteteve tjera, u pengua konstituimi i këshillit komunal edhe atë jo pak, po gati një vjet e gjysmë dhe konstituimi u bë në vitin 1992 edhe atë me 29 Qershor, them dhe kështu ka qenë me reagimin e faktorëve posaçërisht ndërkombëtar. Atëherë ishte e pamundur që prej 34 komunave e fundit e konstituuar ishte Komuna e Gostivarit. Për këtë edhe njëherë i përshëndes dhe i falënderoj udhëheqjen dhe këto këshilltarë të komunës së Gostivarit, për herë të parë e respektuan demokracinë. Prandaj në vazhdën e kësaj ishte edhe ajo vonesë e cila zgjati një vit e gjysmë, shkaku ishin marrëdhëniet e brishta ndërnacionale dhe marrëdhëniet e acaruara ndërpartiake. Gjitha ato ishin faktor kryesor që e penguan konstituimin për një vjet e gjysmë. Ishte e vështirë të udhëhiqet atëherë për arsye se ne funksionuam pa ligj për vetëqeverisje lokale, funksiononim me një buxhet jo një milion e gjysmë marka gjermane të plota. Do ishte e pamundur funksionimi dhe më takon një përshëndetje atij stafi të udhëheqjes apo ministrave tonë të pushtetit qendror të atëhershëm të cilët nuk kursyen nga ndihma që të ndërtojmë, të realizojmë në komunën e Gostivarit. Edhe njëherë i shpreh punë të mbarë kësaj udhëheqje të Kuvendit Komunal të komunës së Gostivarit, sëbashku me gjithë këshilltarët në sjelljen e vendimeve të cilat do jenë pozitive dhe do të jenë vendime që do ta ndihmojnë komunën e Gostivarit në pikëpamjen zhvillimore”, tha Enver Zenku kryetar i parë i komunës së Gostivarit.
Në emër të përfaqësuesve pushtetit qendror, foli Musa Xhaferri, Zëvendëskryeministër i Qeverisë së Republikës së Maqedonisë.
“Përgëzoj kryetarin e komunës dhe stafin e tij për të gjitha ato suksese për gati një vit. Ndaj mendimin që Gostivari meriton si një qendër e madhe në rajonin e Pollogut si një qytet shumë i madh që të ketë një infrastrukturë të mirë, kushte të mira për shkollim dhe kryetari i komunës ta zhvilloje edhe turizmin malor ku do të ketë më shumë vizitor, më shumë të hyra. Do bëjë një apel që qytetarët e Gostivarit të jenë më patriot ti paguajnë taksat për buxhetin e komunës, se ajo u vjen në shërbim të atyre, do ketë shkolla më të mira dhe të rinovuara, do të ketë rrugë më të mira, do ketë pastërti. Ne si pushtet qendror do të insistojmë në programin e ardhshëm dhe ashtu e kemi programin që t’ju japim më shumë financa komunave, më shumë pushtet”, deklaroi Xhaferri.
Për punën njëvjeçare të Këshillit Komunal, foli kryetari Nasir Musliu.
“Gjej rastin të falënderoj kryetarin e komunës së Gostivarit Nevzat Bejta dhe administratën komunale me të cilët kemi një bashkëpunim të shkëlqyer dhe të ndërsjellë dhe rezultat janë tonat, janë rezultate të përbashkëta. Nga 11 mbledhje të mbajtura deri më tani, Këshilli i komunës së Gostivarit ka sjellë vendime të rëndësishme në dobi të qytetarëve dhe në këtë mënyrë ne realizojmë obligimet që ne i kemi para qytetarëve. Vendimet që i kemi sjellë kanë qenë një zgjidhje e shumë nevojave që ekzistojnë në shumë sfera, si në atë te arsimit, urbanizmit, kulturës, sportit, mirëmbajtjes se ambientit etj”, tha Musliu.
Fjalë rasti mori edhe përfaqësuesi i komunës së Smolenit nga Republika e Bullgarisë, me të cilën komuna e Gostivarit është binjakëzuar.
Programi u shërua me pikë muzikore nga Orkestra profesionale nën dirigjim të Prof. Jeton Pustina
Kryetari i komunës së Gostivarit, Nevzat Bejta në fund ndau mirënjohje për të gjithë ata të cilët kanë kontribuuar në zhvillimin dhe promovimin e qytetit, afaristët, sportistët dhe gazetarët.
“Viti 2013 dhe 2014 ka qenë historik për sportistët tanë, të cilët na bëjnë krenar neve si Gostivar, prandaj falënderoj të gjithë për sukseset e arritura, Bellma Bebën, Berat Jakupin, Shëndrit Dearin, Admir Mehmedin, Shkordran Mustafin, Nuri Seferin, por edhe sportistët tjerë për kontributin që japin për ta promovuar kombin dhe shoqërinë e Gostivarit sa më mirë në vend por edhe në mbarë botën”, tha në fund Nevzat Bejta, kryetar i komunës së Gostivarit.
Dita e komunës këtë vit u shënua me shumë aktivitete kulturore, ku pjesë e shënimit të kësaj dite ishin edhe vendosja e fotografive të të gjithë kryetarëve të komunës së Gostivarit, kolonia artistike “Gostivari 14”, komedia “Stjuardesat” dhe ekspozita në Qendrën për Kulturë në Gostivar, me krijimtarinë e pjesëmarrësve në koloninë artistike. Drejtuesit e Shoqatës së Artistëve Figurativ të Maqedonisë “Draudacum”, të udhëhequr nga profesor Reshat Ameti ndanë mirënjohje për kryetarin e komunës, Nevzat Bejta dhe shefin e kabinetit të kryetarit, Bashkim Hasani, artistët pjesëmarrës dhe mediumet.
Dita e komunës më parë festohej me datë 23 Dhjetor. (INA)
