Kampionatit italian të Serisë A i shtohet edhe një futbollist tjetër i kombëtares shqiptare. Qendërmbrojtësi Berat Gjimshiti, është tashmë zyrtarisht lojtar i Atalantës, duke nënshkruar një kontratë deri në vitin 2019.
Fillimisht Gjimshiti ka kaluar me sukses testet mjekësore dhe tashmë do të vihet nën urdhrat e trajnerit tek ekipi i ri, me shpresën se do të gjejë hapësira aktivizimi. Mbrojtësi i ri do të mbajë mbi shpinë fanellën numër 55.
“Atalanta njofton blerjen e të drejtave sportive të mbrojtësit zviceran, të natyralizuar shqiptar, Berat Djimsiti. I lindur në Zurich, më 19 shkurt 1993, Djimsiti u rrit në akademinë e të rinjve të FC Zurich, derisa në vitin 2011 bëri debutimin e tij në ekipin e parë. Në Superligën zvicerane ai ka luajtur 110 ndeshje dhe ka shënuar pesë gola. Me fanellën e FC Zurich ka grumbulluar edhe 11 ndeshje dhe 1 gol në “Europa League”. Berat Djimsiti i bashkohet Atalantës, në Seria A Ai mbrojti ngjyrat e kombëtares U-21 të Zvicrës, para se t’i përgjigjej pozitivisht thirrjes së kombëtares shqiptare, në të cilën bëri debutimin e tij më 4 shtator 2015, në ndeshjen kundër Danimarkës, e vlefshme për kualifikueset e “Euro 2016”.
Me kuqezinjtë Gjimshiti ka shënuar 1 gol në 6 ndeshje, pikërisht në ndeshjen e fundit në grupin eliminator të “Francë 2016” kundër Armenisë, duke kontribuar kështu në kualifikimin historik.
Mbrojtësi i bashkohet kështu kolonisë shqiptare që luan në Itali, Hysajt (Napoli), Berisha (Lacio), Manaj (Inter), Ajeti (Frozinone), si dhe Ledian Memushajt që aktivizohet në Serinë B te Peskara.
