“Paragllajd dhe Via Ferrata janë pjesë e programit ose ofertës turistike që jemi duke e zhvilluar sivjet. Pra, ideja është që qendrat e tjera të Kosovës, por pse jo edhe më gjerë, të njihen me zhvillimet e fundit që ndodhin në Pejë, sa i përket turizmit të sporteve ekstreme”, tha për “Zërin” Nol Smajli, menaxher në festivalin “Into the Park”, i cili fillon të premten, më 24 korrik në Pejë. Këto dhe risi të tjera janë paralajmëruar për këtë edicion, i cili është edicioni i katërt i “Into the Park”-ut. Më tej, Smajli na sqaroi se këto aktivitete rekreative përgjatë festivalit kushtojnë 5 euro, pra ndjekja e një programi, si në Via Ferrata, po ashtu edhe në paragllajd. Sipas tij, të dyja grupet janë të limituara. “Oferta e plotë me çmim më të volitshëm është 15 euro me kamping, një natë hyrje në koncert, Via Ferrata, ngjitje dhe kurs e fluturim me paragllajd,” sqaroi menaxheri Smajli, gjersa fliste rreth risive të edicionit të sivjetmë.
Por, si po iu ecin përgatitjet e gjertanishme organizatorëve? Nol Smajli na tha se përgatitjet po ecin mirë. “Kuptohet, jemi organizatë joqeveritare edhe gjithmonë kemi mungesë të fondeve, sidomos sivjet ku mbështetësit e evenimenteve kulturore nuk po gjejnë interes të përbashkët t’i ndihmojnë zhvillimit e ekonomisë turistike – si kjo e festivaleve, e mos të flasim për institucionet qeveritare që kanë pasur shkurtime shumë të mëdha financiare sivjet për krejt subjektet kulturore”, tha ai, por duke bërë të ditur se disa subjekte kanë qenë më të përkëdhelura nga institucionet në këtë aspekt. Smajli po ashtu na sqaroi se Komuna e Pejës i ka mbështetur me një shumë gati simbolike edhe me mbështetje logjistike, gjegjësisht me lejimin e shfrytëzimit të hapësirave publike, të lejes së punës e kështu me radhë. “Donatorë të tjerë i kemi Ministrinë e Diasporës. Sivjet kemi shumë mbështetje nga sponsorë lokalë, në krahasim me donatorë të tjerë”, tha ai ndër të tjera.
Smajli: Të gjithë jemi vullnetarë
Një gjë që na ra në sy ishte edhe thirrja e organizatorëve për vullnetarë. Menaxheri i festivalit, Nol Smajli, na u përgjigj kësisoj: “Në ‘Into the Park’ të gjithë janë vullnetarë në kuptimin bazik të fjalës, pra askush nuk paguhet për shërbimin që e bën ndaj festivalit, duke filluar prej drejtorit e deri tek vullnetari që punon me gjysmë orari vetëm gjatë dy ditëve të festivalit”. Sipas tij, krejt çfarë vjen në këmbim është ndjenja e vetëkënaqësisë që merret nga puna dhe vlerësimi që e bën zakonisht komuniteti lokal e që, siç na tha ai “nuk ndodh shpesh, por besojmë shumë që do t’i vijë koha edhe kësaj”.
“Në këtë edicion të ‘Into the Park’ e veçantë është pjesëmarrja e grupit të vullnetarëve nga diaspora, që është edhe aktivitet nga projekti që e kemi të mbështetur nga MeD-i,” tha Smajli, duke sqaruar se qëllimi i krijimit të këtij grupi është socializimi i tyre dhe tendenca për krijimin e një grupi bashkëpunues, në të cilin, po këta të njëjtit, do të mundë të ndihmonin njëri-tjetrin në raport me edukim dhe integrim në të dy shoqëritë, si dhe që ta njohin punën që zhvillohet nga të rinjtë këtu, pra vullnetarët vendas, si dhe me vendin dhe rëndësinë e orientimit të zhvillimit turistik që përqendrohet Peja si komunë.
Por si është menduar prej organizatorëve akomodimi i këtyre vullnetarëve dhe pjesëmarrësve e vizitorëve? Smajli për “Zërin” tha se akomodimi bëhet në disa lokacione. “Së pari në dy hotele të porsahapura në Pejë, të cilat paguhen 12 euro për një natë e me mëngjes dhe kampingu i festivalit, i cili gjendet afër skenës kryesore të muzikës në ‘Karagaq’. Hyrja është 3 euro nëse merret në shfrytëzim tenda jonë, kurse 2 euro me tënde të vizitorit”, tha ai.
Këtë vit siguria më e lartë
Ne u interesuam të dinim diçka edhe me masat e sigurisë që janë ndërmarrë për ta siguruar mbarëvajtjen e festivalit. Nol Smajli, menaxheri i “Into the Park”, na tha se pasi që nëpër medie po qarkullon ideja e sulmeve të mundshme, janë siguruar që sivjet, përveç sigurimit të tyre, ta kenë edhe Policinë e Kosovës të pranishme për aq ditë sa edhe zgjat festivali, duke shtuar se “jemi duke e krijuar një memorandum bashkëpunimi, i cili edhe përmban një plan të detajuar në lidhje me mbarëvajtjen e sigurisë. Kemi lajmëruar gjithashtu edhe ambulancën e ndihmës së shpejtë për në secilin eveniment”.
“Duke konsideruar arritshmëritë e objektivave dhe të rezultateve të festivalit, numrin e pjesëmarrësve dhe artistëve nga vendi, rajoni dhe nga bota, numrin e artistëve të rinj të angazhuar në aktivitete rekreative dhe kulturore”, drejtori i “Into the Park Festiva”, Granit Gashi, na pati thënë për “Zërin” ditë më parë se mund të themi se edicionet paraprake të festivalit “Into The Park” kanë qenë të suksesshme dhe paraqesin shembull për ngritjen e potencialeve edukative, kulturore, artistike dhe ekonomike në Pejë e më gjerë.
Për sivjet, menaxheri Nol Smajli na tha se ndonjë emër i ri sa i përket muzikës nuk do të jetë, përveç bashkëpunimeve me disa organizata joqeveritare “simotra” nga pjesë të tjera të Kosovës, të cilat do të kenë mundësi të promovohen para audiencës, konsiderueshëm të madhe, që tërheq festivali “Into the Park”.
