Edhe sivjet, siç është kthyer në traditë prej disa vitesh, politika ka festuar e ndarë dy festat më të rëndësishme të kombit. Një ditë më parë, Dita e Pavarësisë u përkujtua me aktivitete në kryeqytet dhe në disa qytete të vendit.
Kryeministri Rama zgjodhi Vlorën, si kryeqyteti i Pavarësisë, për të festuar 103-vjetorin e shpalljes së Shqipërisë shtet i pavarur.
Ndërsa opozita kujtoi në të njëjtën ditë ngritjen e flamurit dhe çlirimin e vendit. Kryetari Basha dhe ish-kryetari Berisha bënë homazhe në Varrezat e Dëshmorëve dhe pranë monumenteve të Adem Jasharit e Azem Hajdarit.
Ndërsa sot, në ditën e 71-vjetorit të Çlirimit të vendit nga pushtuesit nazi-fashistë, kryeministri Rama, presidenti Nishani, kryebashkiaku Erion Veliaj dhe përfaqësues të tjerë të maxhorancës kanë marrë pjesë në një ceremoni të organizuar tek “Varrezat e Dëshmorëve” në Tiranë.
Në ceremoninë zyrtare morën pjesë edhe deputetët e LSI-së, Petrit Vasili dhe Luan Rama, të cilët vendosën kurora me lule në Monumentin “Nënë Shqipëri”, në nderim të kujtimit të dëshmorëve të rënë në Luftën Antifashiste Nacional Çlirimtare.
Pas ceremonisë, Luan Rama u shpreh se nderimi për dëshmorët e Luftës Antifashiste Nacional Çlirimtare në thelb është nderim për të gjithë ata djem dhe vajza që sakrifikuan jetën për çlirimin e atdheut.
“Nderim për dëshmorët e Luftës Antifashiste Nacional-Çlirimtare, nderim për 29 Nëntorin, që në thelb është nderim për të gjithë ata djem dhe vajza që sakrifikuan jetën për çlirimin e atdheut, nderim për të gjithë ata që bënë Luftën e madhe Antifashiste Nacional Çlirimtare, është detyrimi i brezave, është mirënjohja jonë ndaj sakrificës së tyre, por nga ana tjetër është ndërkaq edhe betimi ynë për të pasur gjithmonë ëndrrën e tyre, sakrificën e tyre shembullin e tyre busull orientimi për të bërë më të mirën për Shqipërinë antifashiste, për Shqipërinë europiane”, – tha Rama.
I pyetur se si e shikon faktin që politika shqiptare vazhdon të jetë e përçarë në këtë ditë, me njërën palë që e feston më 28 Nëntor Ditën e Çlirimit, Rama tha se kjo është shenja e pafytyrësisë politike, që në ngjarje të tilla nxjerrin lakuriq në sytë e opinionit publik ata që e bëjnë homazhin për hipokrizi.
“Është shenja më tipike e pafytyrësisë politike dhe e sjelljes hipokrite që në ngjarje të tilla natyrisht nuk bëjnë asgjë tjetër, por nxjerrin lakuriq në sytë e popullit dhe në sytë e opinionit publik ata që vijnë këtu dhe e bëjnë homazhin për hipokrizi. Janë ata që i kanë rivrarë dëshmorët e Luftës Antifashiste Nacionalçlirimtare e qëndrimin e tyre, por nga ana tjetër kjo nuk mund të bëjë asgjë, sepse populli, qytetarët, Shqipëria e ka vlerë të vetën këtë luftë, e ka medalje të krenarisë së saj dhe ne do ta kemi gjithmonë kështu”, tha ai.
