Ai ka ardhur nga përtej vdekjes, vetëm për të mbajtur një premtim.
Janë lotët e nënës, që e djegur nga malli për vajzën e martuar larg, i kujton Kostandinit besën e dhënë, që do t’ia sillte vajzën sa herë ta merrte malli. Atëherë kur shpresat ishin thyer dhe nëna dukej që s’do ta shihte më kurrë vajzën, ajo shfaqet në oborr.
Më solli, Kostandini, thotë ajo, duke tronditur anëtarët e familjes, pa e ditur që i vëllai kishte ndërruar jetë.
Kjo legjendë shqiptare do të befasonte dramaturgun Matt Opatrny, i cili sapo dëgjoi idenë e Lirak Çelajt për të ngjitur në skenën e “The Interart Theatre” këtë vepër nisi të punonte për ta përshtatur për publikun amerikan.
Një fabul që duket sikur ka ardhur thellë nga historia, gati-gati e pabesueshme për simbolikën që mbart.
Por besa e Kostandinit është një akt i vyer për shqiptarët, akt i cili tregohet bukur përmes kësaj legjende.
Më 23 prill në “Interart Theatre” pjesë e “Broadway Theatre” në Nju Jork, do të ngjitet në skenë drama “Doruntina” shkruar nga Matt Opatrny dhe Lirak Çelaj dhe nën regjinë e Jessica Burr dhe Florent Mehmeti.
“Kjo është një vepër që mbart brenda dashuri dhe pse përballja me fantazmën e Kostandinit duket si diçka surreale për amerikanët”, thotë Opatrny.
Udhëtimi i pamundur me kalë i Kostandinit, vjen në Teatër si një imagjinatë që sfidon realitetin, vetëm për të përmbushur një dëshirë
. Një vëlla shqiptar që sfidon vdekjen dhe nxjerr në pah dashurinë e pafundme për familjen dhe se besa e shqiptarit nuk mund të thyhet asnjëherë. Ajo mbahet edhe me vdekjen.
Për dramaturgun Opatrny kjo vepër mban vlera të veçanta morale dhe shoqërore, shkruan gazeta “Shqip”.
Vepra do të flasë shqip dhe anglisht përmes një përzierje aktorësh nga dy vendet, si Zenzele Cooper, Dave Edson, Jason Griffin, Kelly Hayes, Laura Wickens, Ilire Vinca-Çelaj, Lirak Çelaj, Nëntor Fetiu dhe Njomëza Ibraj.
Vepra do të ngjitet në skenë si pjesë e një bashkëpunimi mes “Blessed Unrest” dhe teatrit “Oda” të Kosovës.
Për drejtorin e Teatrit “Oda” Lirak Çelaj, arti luan një rol të rëndësishëm në përcjelljen e identitetit të një vendi.
Nuk është hera e parë që kjo legjendë e sjellë dhe në një roman nga shkrimtari ynë, Ismail Kadare, vihet në skenën e një teatri.
Disa muaj më parë ishte regjisori grek, Sotiris Hatzakis, i cili e ngjiti në skenë, vepër ku interpretonte dhe aktorja shqiptare, Margarita Xhepa.
Mediet e Nju Jorkut kanë nisur të shkruajnë për këtë vepër, duke thënë se nuk duhet humbur një histori që duket sikur ka dalë nga një botë tjetër.
“The Interart Theatre” njofton se të gjitha biletat për këtë shfaqje janë shitur.
