Politika gjermane bie dakord: Pas një samiti në Berlin, kancelarja Angela Merkel ka vendosur që Shqipëria, Kosova dhe Mali i Zi të klasifikohen si vende të sigurta të origjinës.
Kjo do të thotë që aplikantët për azil do të dërgohen më shpejt në vendin prej nga kanë ardhur.
Vitin e kaluar në këtë listë ishte përfshirë edhe Bosnja, Maqedonia dhe Serbia.
Sipas vendimit, të zbardhur nga mediat gjermane, lista e vendeve të origjinës do të rishikohet çdo dy vjet.
Për azilkërkuesit nga këto shtete, që kanë aplikuar për azil nga 1 shtatori 2015, do hyjë në fuqi ndalimi i punësimit.
Kjo vlen për të gjithë periudhën e procedurës së azilkërkimit dhe nëse kërkesa refuzohet.
Njëkohësisht, qeveria kërkon që të krijojë për njerëzit nga këto gjashtë shtete mënyra të reja të emigracionit të ligjshëm si një alternativë ndaj sistemit të azilit.
Kush mund të ofrojë një kontratë punësimi ose formimi, do të punojë ose të marrë arsimim në Gjermani.
Azilkërkuesit do të qëndrojnë deri në gjashtë muaj në qendrat e pritjes. Deri më tani ishte vetëm tre muaj.
Azilkërkuesit nga vendet e sigurta të origjinës, mes tyre Shqipëria, do qëndrojnë deri në pritje të përgjigjes për kërkesën e azilit në këto qendra.
Ata do marrin kryesisht vetëm shërbime, jo pagesa në dorë.
Të ardhurat në dorë do paguhen vetëm një muaj paradhënie.
Qeveria gjermane do hapë kurse integrimi për azilkërkuesit, të cilët kanë një perspektivë të mirë për të qëndruar, duke shtuar burimet financiare.
Trafikantët pritet të dënohen më shumë në të ardhmen. Ata do burgosen minimumi tre muaj e sipër.
