Pas ngjarjes së bujshme dhe mjaft të rëndë me rojen e shkollës dhe 15 vjeçares në Babrru, ka ardhur dhe reagimi stafi pedagogjik i gjimnazit ‘Gramoz Palushi’
Vetë stafi pedagogjik shprehet se vajza në fjalë ka qenë nxënëse vetëm rreth 5 muaj, dhe se gjatë gjithë kësaj periudhe nuk ka shfaqur shqetësime. Më tej sqarojnë dhe faktin se roja i shkollës, që është dhe protagonisti kryesor i ngjarjes së rëndë, nuk ka punuar asnjë ditë pranë gjimnazit në fjalë.
Po ashtu ata shprehen mjaft krenarë për punën dhe rezultatet e arritura me nxënësit ndër vite në atë gjimnaz.
Reagimi i plotë:
Duke iu referuar disa faqeve sociale, rreth ngjarjes së ndodhur në Babrru, po i’u drejtohemi juve ‘Shqipëriaime’, si portali më i ndjekur në vend për sa më poshtë vijon:
-Vajza në fjalë ka qenë nxënëse e klasës së dhjetë në gjimnazin tonë, vetëm rreth 5 muaj dhe gjatë kësaj kohe nuk ka shfaqur as më të voglin shqetësim tek stafi ynë.
-Mësuesja kujdestare ka qenë gjithnjë në kontakt të vazhdueshëm me nxënësen dhe prindërit e saj, sikurse me gjithë nxënësit e tjerë.
-Ngjarja në fjalë i vishet shkollës sonë nga faqe sociale, portale dhe individë dashakeqës anonim, kur dihet botërisht se nuk ka ndodhur në shkollën tonë apo ambjentin e saj.
-Sqarojmë se Roja i shkollës, protagonisti i ngjarjes nuk ka punuar asnjë ditë pranë gjimnazit ‘G.Palushi’ (kjo është e verifikueshme nga listë prezencat përkatëse të dorëzuara në bashkinë Kamëz).
-Drejtori i shkollës sonë vazhdon të akuzohet nga prokurorë të korruptuar për gjasme ‘korrupsion në shkollë’ rreth pagesës së mësuesve për disa trajnime, pagesë e cila është bërë korrekt nga ana jonë si mësues në bazë të faturës së lëshuar nga kompania trajnuese. Nënvizojmë me përgjegjësi të plotë që pagesa në fjalë ka qenë 3000Lekë dhe Asnjëherë 6000Lekë.
Kjo “ngjarje” e stisur qëllimisht ngatërrohet me ngjarjen e nxënëses në fjalë dhe pikërisht në këtë moment.
-Ne si staf jemi krenarë për punën tonë, për rezultatet e arritura me nxënësit, treguesit e performancës ndër vite dhe shprehim indinjatën e thellë për përbaltjen e emrit tonë.
-Urojmë të marrë fund e gjithë kjo fushatë e pakuptimtë shpifjesh ndaj drejtuesve të shkollës dhe stafit tonë pedagogjik!
Stafi pedagogjik
SHËNIM: Ky peticion është i nënshkruar nga stafi i gjimnazit ‘G.Palushi’, Paskuqan/Shqipëriaime
