“Shkencëtari mund të bëhet artist. Artisti vështirë se bëhet shkencëtar”, – Faik Konica.
Edi Rama nuk e do shkencën. Sepse e nxjerr të palarë. Artistët vizualë tek ne kanë vuajtur nga aksesi me shkencën dhe nuk e kanë pranuar dot.
Rama si piktor peneli njeh si shkencë dronat me flamur, ‘Led wall’-et, mikrofonat, altoparlantë apo autobusët e transmetimit. Për këto është gati të hedhë miliona.
Pajisjet e mësipërme shkencore janë përdorur nga stafi i Ramës si mjet korrupsioni ku pothuaj 4 miliardë lekë janë abuzuar në këtë formë gjoja për prezantime shkencore të Ramës.
Ndërkohë që institucionet shtetërore si TKOB, Teatri Kombëtar, Teatri i Metropolit dhe COD dhe Stenda e Shqipërisë në Bienale janë përdorur nga drejtuesit që ka caktuar Rama për të promovuar veten e tyre si regjisorë, koreografë, artistë vizualë, etj.
E bëra këtë hyrje për të shpjeguar që Rama e ka shndërruar artin, fushën nga vjen në një ekskluzivitet të shpurës së tij. Nga kjo derexhe Rama del dhe kërkon llogari institucioneve të tjera. Aq më tepër nga tavolina e një NGO-je.
Shkenca ka bazë fondet. Për shembull ‘Ars Elektronika’ në Austri, muzeu më i madh në botë i artit të aplikuar, e ka buxhetin vjetor 34 milionë dollarë. N.q.s. SHBA është shtet i fuqishëm, është se ka fonde për shkencën, për ushtrinë.
Shkenca gjithmonë zhvillohet në vendet e pasura. Shkenca fillon që nga ushtria, mjekësia deri tek celulari dhe gjuha.
Serioziteti i dikujt që bën moral duket tek faktet, sidomos kur është kryeministër i vendit. Dhe kur Akademia e Shkencave e ka fondin e kërkimeve shkencore vjetore ZERO dhe botimeve vjetore dyfishin e kostos së dasmës së Erion Veliaj, Ramës mund t’i thuash shprehjen e Hollbruk ndaj Millosheviçit: “Stop Bullshit”.
“Stop Bullshit” kur fondet për gjuhën shqipe në vit janë sa një konferencë që ti organizon tek Sheratoni.
“Sop Bullshit” kush shteti s’jep asnjë fond për Universitetin Politeknik për studime 5-vjeçare për naftën, gazin, pasuritë ujore, mineralet, etj. Për kërkime, studime, udhëtime dhe botime në revista. Kur s’ka një revistë shkencore. Kur s’ke marrë pjesë në një konferencë shkencore të gjeologjisë, naftës, inxhinierisë, etj. Por shkon nëpër varrime e jep tapi legalizimesh.
“Stop Bullshit” kur ti as nuk ke bërë një vizitë në institucionet shkencore të vendit. Kur ti as ke marrë një mendim të tyre apo s’ke dhënë një financim për një studim serioz, ndërkohë që Anri Salës dhe ‘Atelier 4’ i ke dhënë ç’kanë dashur. Dhe bën konferenca me Ançelotin. Kryeministër-futbollist mund të jesh, por ti dhe kaq mezi je, sepse pasion ke basketbollin.
“Stop Bullshit” kur futbollit i ke dhënë miliona euro dhe favorizime, ndërsa institutet shkencore s’kanë letër A4. Kur përmbytjet ndodhin sa herë bie shi 20 minuta, ndërkohë të vetmin Institut Ujërash që merret pikërisht me digat dhe ujërat e ke kthyer në skemë korrupsioni në emër të artit multifunksional me ‘Atelier 4’.
“Stop Bullshit” kur s’ke asnjë shkencëtar, inxhinier, studiues në parlament, as si këshilltar as kurkund, por e ke mbushur shtetin me rrugaçë dhe njerëz-produkte NGO-sh që shesin çdo gjë për të folur anglisht.
“Stop Bullshit” sepse në nivelin akademik dhe artistik e ke shndërruar Tiranën në nivel provincial në krahasim me Prizrenin dhe Prishtinën. Ku Onufri e ka buxhetin 1 milion lekë (të fejohesh kushton më shumë) dhe ku buxheti i Teatrit Kombëtar për një vit kushton sa një konferencë jote tek Pallati i Kongreseve.
“Stop Bullshit” ku s’ke shkencë as në lice, as në Akademinë e Arteve as kurrkund në sistemin artistik. Që është fusha jote. Nga vjen ti. Ku në nivelin e edukimit, në vend që të fusësh gjuhët e programimit, do të na frymëzosh me ide fetare.
“Stop bullshit” kur institutet fetare i financon të paktën 2 miliardë lekë në vit, dhe ku shumë organizatave fetare ndërkombëtare ju ke hapur dyert e shtetit, sidomos të Ministrisë së Rinisë. Ndërkohë që s’ke bërë një promovim shkencor në jetën tënde. Kujton se duke bërë ‘selfie’ me 3 të rinj që kanë bërë nga një aplikacion, kjo është shkencë shtetërore.
Lista nuk mbaron. Po ndoshta unë jam duke pretenduar shumë me këtë shkrim.
Madje nuk jam i sigurt tani nëse bëra mirë që u ula dhe i shkrova këto radhë, sepse kur e mendoj…një mësues vizatimi kemi për kryeministër.
*VINI RE: ’Andy Warhol’ është pseudonim. Autori është funksionar publik. HashtagAL publikoi me anonimat, pasi shkrimi përbën interes publik. – HashtagAL
