Janë mbyllur tashmë numërimet për 16 Bashki, të cilat do drejtohen kryesisht nga e majta.
Bie në sy se e majta ka arritur fitore edhe në disa zona në Veri, ku pritej një fitore e së djathtës.
Në 4 vitet e ardhshme bashkia e Himarës, Konispolit, Hasit, Skraparit, Pustecit, Delvinës, Kolonjës, Libohovës, Peqinit, Mirditës, Fushë Arrëzit, Belshit, Peqinit dhe Pukës do të drejtohen nga kryetarë të koalicionit të majtë.
Ndërkohë PD ka nisur të numërojë Bashkitë e para. Ajo ka fituar në Tropojë, pas një betejë jo të lehtë, ndërsa surpriza është shënuar në Përmet, ku PD fiton këtë Bashki me lehtësi.
Rreth orës 06:00 të mëngjesit të sotëm u mbyll procesi i votimit në Bashkinë e Hasit, ku Adem Lala i koalicionit të majtë arriti të fitojë me 4884 vota ose 52.98%, ndërsa kandidati i APPD, Elez Maçi arriti të merrte 4245 vota ose 46.05%. Në garë për këtë bashki ishte edhe kandidati i PSD, Gëzim Ukperaj, i cili mori vetëm 0.97% të votave.
Procesi i numërimi është mbyllur edhe në Skrapar, ku fitues ka rezultuar Nesim Spahiu, i cili mori 84.43%, ndërsa rivali i tij Hajredin Bakjasi 15.57% të votave.
Ndërkohë edhe në Delvinë përfundoi procesi i numërimit dhe Rigels Balili, kandidat i ASHE, tashmë është kryetari i ri i kësaj bashkie, pasi ka marrë 72.8% të votave, ndërsa kandidati i APPD, Dhurim Alinani ka marrë 27.2% të votave. Edhe Bashkia e Peqinit është fituar nga një kandidati i majtë, Saimir Hasalla, i cili arriti të merrte 9020 vota, ndërsa Albert Kreçi kandidati i APPD mori 4284 vota.
Në Kolonjë, Arben Malo i ASHE-së ka marrë 4997 vota, ndërsa Viktor Duro, kandidat i APPD-së, 4076 vota. Luiza Mandi e ASHE-së ka arritur të marrë 53.65% të votave në Libohovë, duke mundur Altin Çomon e APPD-së me 46.35%.
Po ashtu edhe bashkia e Fushë Arrzit dhe e Pukës është fituar nga kandidatët e ASHE, por me një diferencë të vogël. Në Pukë Gjon Gjonaj arriti të fitonte me një diferencë vetëm me 97 vota, ndërsa në Fushë Arrëz diferenca ishte vetëm me 66.
Rreth orës 10:20 përfundoi edhe numërimi në Mirditë, kur Ndrec Dedaj i mazhorancës fitoi me 55.37 përqind të votave, kurse Gjergj Prenda i APPD mori 44.63 përqind të votave.
E majta merr edhe bashkinë e Konispolit. Kandidati i ASHE, Shuaip Beqiri ka fituar me 650 vota më shumë se kandidati i djathtë, Ismail Murtaj.
Ndërkohë e majta ka arritur të fitojë edhe Himarën me kandidatin Jordo Goro.
Ai ka marrë mbi 4747 vota, shumë më përpara rivalit të djathtë.
