Kryeministri i Shqipërisë Edi Rama pak kohë më parë deklaroi se nuk arriti të bindë PD-në për ta votuar së bashku, draftin e shkruar bashkarisht me partnerët strategjikë të reformës në drejtësi.
Sipas kryeministrit Rama, qeveria bëri të gjitha përpjekjet e mundshme për t’ia dhënë kundërshtarëve politik një mundësi reale kompromisi, pa cenuar përmbajtjen thelbësore të kësaj reforme.
“Ne e kishim pranuar 100 % këtë plan, ku përfshihej edhe shumica e cilësuar e 2/3-ve që është kërkuar papushim nga PD, pas leximit të parë të raportit të Komisionit të Venecias. Për habinë e shumëkujt ndoshta, por jo timen, PD e refuzoi këtë ofertë që e barazon shumicën dhe opozitën në përzgjedhjen me votë të kandidatëve për pozicione të caktuara në sistemin gjyqësor”, tha Rama pas takimit për reformën në drejtësi me kreun e PD-së, Lulzim Basha.
Referuar ligjeratave të kryeministrit, shkaku i bllokimit të reformës në drejtësi, ishte opozita shqiptare. Gjithpoaq, përgjatë një interviste për Zërin e Amerikës, kreu i Kuvendit Ilir Meta deklaroi se opozita kishte të drejtë, kur kërkoi plotësimin e rekomandimit Nr.88 të opinionit final të Venecias.
“Është e vëtetë se për Bashën kam thënë që ai gënjen, por më duhet ta them se fjalën që Lulzim Basha më ka dhënë se në rast se 88-ta do të plotësohej, PD do të mbështeste miratimin, ai e ka mbajtur.Uroj të vzhdojë të mbajë këtë qëndrim që tregon lidership”-tha Meta.
T’i biem nga t’i biem, pas këtyre qëndrimeve të dy forcave qeverisëse që janë pjesë e një koalicioni, pyetja që shtrohet është: Sa ia vlen të jenë bashkë në qeverisje dy forca politike që ndajnë mendim kundra për një nga çështjet më themelore, të paktën sipas tyre, të dekadave të fundit për shtetin shqiptar, siç është reforma në drejtësi?
Mbështetur në fjalën e kreut të Kuvendit, dhënë për Zërin e Amerikës, opozita kishte të drejtë dhe ajo çka Edi Rama kishte deklaruar, partneri kryesor në bashkëqeverisje, ishte jo vetëm gabim, por po tentonte të shtrinte tentakulat e tij politike që nëpërmjet kësaj reforme të kapte njëherë dhe përfundimisht drejtësinë në Shqipëri.
Ilir Meta deklaroi se qeverisja me PS do vazhdojë sipas kontratës së bërë në 2013, madje asgjë nuk do ta levizë nga ajo marrëveshje burrërore, pavarësisht faktit se një marrëveshje e tillë, pak vlen për mënyrën se si janë shfaqur ngjarjet përgjatë këtyre muajve.
