Kryetari i komisionit parlamentar serb për Kosovën, Milorad Drecun, ka thënë se territori i diskutueshëm mes dy vendeve i përket Serbisë.
“Mali i Zi, fatëkeqësisht ka pranuar pavarësinë e Kosovës dhe tash po përballet me ndarjen e territoreve të cilat nuk i takojnë asnjërës palë, por Serbisë”, ka thënë Drecun.
Ai në një prononcim për radio “Sputnik” në gjuhën serbe ka thënë se raste të tilla, si protestat, kërcënojnë më së shumti komunitetet jo-shqiptare në Kosovë, saktësisht ndaj serbëve, transmeton lajmi.net.
Drecun ka thënë se një strategji e tillë, përdorët gjithmonë kur vije në diskutim formimi i Asociacionit të Komunave Serbe.
“Kjo është një taktikë, e cila fatkeqësisht krijon rezultate në favor të shqiptarëve”, ka thënë Drecun, duke shtuar se shqiptarët edhe tutje, përmes dhunës dhe protestave, vazhdojnë të bëjnë presion ndaj bashkësisë ndërkombëtare, posaçërisht ndaj Brukselit, eventualisht ndaj Uashingtonit, për t’i pranuar kërkesat e tyre.
Drecun vlerëson se kryeministri i Malit të Zi, Milo Gjukanoviq, ka bërë gjithçka çfarë ka mundur kundër interesave të Serbisë dhe popullit serb, përfshirë edhe goditjen më të madhe atëherë kur e pranoi Kosovën si shtet të pavarur. Ai ka thënë se tash Gjukanoviq duhet të përballet me pasojat.
