Pas Shteteve të Bashkuara të Amerikës e cila tashmë ka pothuajse një traditë në emërime ambasadoresh në Kosovë (Tina Kaidanow dhe tashti edhe Tracy Jacobson) duket që edhe Gjermania ka vendosur të nisë me këtë praktikë në Kosovë.
Kështu, siç mësohet nga burime diplomatike në Prishtinë, Qeveria e Gjermanisë, përkatësisht Ministria e Punëve të Jashtme në Berlin ka vendosur që në Kosovë për herë të parë ta emërojë një diplomate si pasardhëse të ambasadorit të deritashëm Peter Blomeyer.
Mësohet se Ambasadore e Jashtëzakonshme dhe Fuqiplotë e Gjermanisë në Kosovë është emëruar diplomatja Angelika Viets, e lindur në Stuttgart të Gjermanisë dhe me një përvojë të gjatë në diplomacinë e këtij shteti.
Angelika Viets ka mbaruar gjimnazin në Stuttgart kurse më pas ka studiuar Amerikanistikën, Anglistikën dhe Romanistikën si dhe ka specializuar në Francë e Amerikë me shërbimin e shkëmbimit akademik gjerman (DAAD). Për DAAD ajo më pas ka punuar si lektore në Universitetin Gilan të Iranit, në Universitetin Tongji të Shangait si dhe në Osaka në mënyrë që më pas të mbarojë shkollimin si diplomate.
Nga viti 1987 deri në vitin 1990 ka punuar në Ambasadën e Gjermanisë në Japoni pastaj në Ministrinë e Punëve të Jashtme në Bon, kurse në vitet 1994-1997 ka shërbyer në Ambasadën e Gjermanisë në Madrid të Spanjës, pastaj në Ambasadën e Gjermanisë në Peking të Kinës.
Në vitet 2000-2002 Viets ka qenë zëvendësshefe e Qendrës së rekrutimit të diplomatëve në Ministrinë e Jashtme, kohë kjo në të cilën edhe botoi disa libra për Kinën dhe Shangain.
Një kohë ajo ishte edhe Sekretare Gjenerale e Qendrës Japonezo-Gjermane në Berlin kurse nga viti 2006 deri në vitin 2011 ishte udhëheqëse Referati në Ministrinë e Jashtme të Gjermanisë në Berlin.
Nga viti 2011 deri në qershor, Viets ishte ambasadore e Gjermanisë në Singapor kurse nga kjo verë ajo do të shërbejë në Kosovë si Ambasadore e Gjermanisë në Prishtinë.
