Kreu i Komisionit Ekonomik në Kuvendin e Kosovës, kontaktuar nga Express ka thënë se mocioni i iniciuar nga ana e kreut të Nismës, Fatmir Limaj, nuk do të ketë sukses.
“… Mocioni natyrisht që mund të bëhet, por unë mendoj që ky mocion do të jetë joproduktiv. Nuk është i motivuar me performancën e Qeverisë por ma tepër kemi të bëjmë me një luftë politike që shpeshherë e quaj primitive për pushtet”, ka thënë Mustafa të hënën për Express.
Ai thotë se me anë të inicimit të këtij mocioni institucionet kosovare po humbin kohë dhe energji, ngase, sipas tij, po anashkalohen çështjet e tjera që janë më madhore për vendin.
“Natyrisht që Qeveria duhet të mbahet përgjegjëse por nuk mendoj që këtu është brenda e opozitës ajo më tepër është që ky mocion të bëhet në funksion të luftës politike partiake për pushtet”, ka thënë ai.
Ndërkohë i pyetur se si i komenton deklaratat që disa deputetë të koalicionit qeverisës e kanë mbështetur nismën e opozitës për mocionin për rrëzimin e Qeverisë, Mustafa ka thënë se nuk i bëjnë aspak përshtypje.
“Nuk kris kiameti që Naiti ta përkrahë këtë mocion e edhe ndonjë tjetër por besoj që kjo nuk do të ketë sukses”, ka thënë ai.
E të paktën tre deputetë të PDK-së po e përkrahin rrëzimin e Qeverisë. Deputeti i PDK-së, Shukri Buja, ka thënë se do ta përkrahë rrëzimin e Qeverisë të iniciuar nga Nisma për Kosovën.
Pro rrëzimit të Qeverisë është deklaruar edhe Nait Hasani. Mocionin për rrëzimin e Qeverisë e kanë përkrahur edhe AAK e “Vetëvendosje”. Në këtë situatë, Isa Mustafa ka deklaruar se mandati i Qeverisë do të shkojë deri në fund.
