Xhani De Biazi është bërë pjesë e listës së trajnerëve kandidatë për të marrë drejtimin e kombëtares italiane pas largimit të Antonio Kontes. Trajneri i përfaqësueses kuqezi është kthyer në një prej emrave më të lakuar përtej Adriatikut pikërisht falë suksesit të jashtëzakonshëm që korri në pankinën e Shqipërisë. Ndaj nuk është aspak çudi që tashmë në listat e përpiluara nga Federata Italiane (FIGC) gjendet edhe emri i tij. Sipas mediave italiane, Antonio Konte shumë shpejt do të shpallë largimin nga drejtimi i përfaqësueses pas Euro 2016, duke i dhënë mundësinë FIGC që të fillojë kërkimin për pasardhësin e tij. Që në momentin kur filluan të qarkullonin zërat për largimin e Kontes drejt Çelsit, drejtuesit e FIGC përpiluan një listë me emra të njohur, si Roberto Donadoni, Valter Maxarri apo edhe Roberto Mançini. Por gjatë ditëve të fundit, kanë filluar të shtohen zërat për një interesim të mundshëm ndaj Xhani De Biazit, sidomos pasi ky i fundit mori “Stolin e Artë” nga vetë FIGC, duke u cilësuar tanimë pjesë e elitës së trajnerëve italianë. Këta zëra shtynë drejtuesit e emisionit të njohur televiziv sportiv italian, “La Domenica Sportiva”, që të pyesnin rreth kësaj teme krahun e djathtë të De Biazit, Paolo Tramezanin, i cili është njëkohësisht opinionist në rrjetin televiziv “Rai”. “De Biazi tek Italia? Do të jetë me të vërtetë e vështirë që ta shkëpusin nga Shqipëria. Gjithsesi, ne nuk kemi folur asnjëherë rreth kësaj teme bashkë”, tha ndihmëstrajneri i përfaqësueses shqiptare. Edhe pse De Biazi ka deklaruar se do të respektojë marrëveshjen që e sheh në drejtimin e kuqezinjve edhe për eliminatoret e Botërorit 2018, një ofertë e rëndësishme, për më tepër nga përfaqësuesja e vendlindjes së tij dhe me shumë emër si Italia, do të ishte e pamundur të refuzohej. Kontrata me FSHF-në ka një klauzolë largimi prej 100 mijë eurosh, lehtësisht e pagueshme nga FIGC, por drejtuesit e futbollit shqiptar nuk do ta aktivizojnë këtë klauzolë nëse trajneri dëshiron t’i japë lamtumirën Shqipërisë, të ndërgjegjshëm se ai ka dhënë maksimumin për përfaqësuesen tonë. Emërimi tek Italia do të krijonte një situatë shumë të çuditshme në eliminatoret e Botërorit, pasi kjo skuadër është prej rivalëve të Shqipërisë në grup dhe De Biazi do të kthehej shumë shpejt në një “armik” të kuqezinjve. Ndërkaq, De Biazi vazhdon t’u gëzohet vlerësimeve dhe çmimeve të njëpasnjëshme që po merr në këtë periudhë. Pas nderimit nga FIGC dhe FSHF gjatë javës së kaluar, dje ai ka marrë një çmim edhe nga krahina e Trivenetos. Këtë radhë, në duart e trajnerit të Shqipërisë ka përfunduar çmimi “Panchina Doc”, që u jepet figurave të spikatura të sportit në këtë krahinë. De Biazi është cilësuar si përfaqësuesi më i mirë i saj në arenën kombëtare dhe ndërkombëtare për vitin e fundit.
