Petrit Kuçana
“Çunat e Londrës” mbetet zhargon përçudnues që u servir më tepër si një “gjetje e detyruar” e kryeministrit Rama, që u përdor në prag të fushatës elektorale, për inaugurimin e aeroportit të Kuksit. Duket se kjo gjetje “u zbulua” nga kryeministri, “për të shpërblyer” ata që, sipas tij, e paskan sharë me libër shtëpie nëpër rrjetet sociale.
Këtë zhargon e përcollën edhe mediat, ku dirigjenti kryeministër luajti notën e fundit në një ngjarje të shumëpritur siç ishte hapja e aeroportit të Kuksit.
Tashmë gjithçka është harruar, teksa vjeshta po afrohet e “çunat e Londrës” sërish nuk mund të vijnë në Kukës.
Mbase shumkujt i kujtohet ai entuziazmi qeveritar, sidomos i ministres Balluku që guxoi t’i shkonte më tej “betejës ndaj atyre që i paskërkan sharë kryeministrin” cilësonte edhe si “çunat çamarrokë të Londrës”.
Inaugurimi i Aeroportit të Kuksit padyshim që ka qënë dëshirë e kahershme e mërgatës shqiptare, pasi është parë si një mundësi për” zbutjen” e Rinasit, aeroportit më të shtrenjtë në rajon dhe më gjerë.
Prej kaq e kaq vitesh Rinasi ishte kthyer në portën e hekurt e të pakalueshme të shumë e shumë mërgimtarëve, që ‘me një të rënë të lehtë të lapsit’ zgjidhnin arroportet e vendeve fqinjë duke anashkaluar Rinasin.
Shtrenjtësinë e Rinasit e konfirmonin edhe ministra apo deputetë të kabinetit të qeverisë Rama, herë duke fajësuar kinezët, e herë duke aluduar me problemet që paskërka patur shteti Shqiptar me kontratat. Mirëpo një ditë të bukur, Rinasi u gdhi me pronarë shqiptarë dhe sot e kësaj dite askush nuk guxon ta përmendë këtë fakt e as shtrenjtësinë e Rinasit.
Askush nuk jep një përgjigje se përse Shqipëria është i vetmi vend, ku nuk guxojnë të vijnë linjat LowCost si Ryanair.
E pikërisht për këtë, shumë idealistë mërgimtarë shpresuan se Rinasi, do të ishte një antipodi që do të mund të neutralizonte Rinasin, duke normalizuar konkurrencën që do të çonte në uljen e çmimit të biletave, të pakten sa vendet e rajonit.
Me hapjen e aeroportit të Kukësit shumkush shpresonte se do të marrë fund koha, kur emigrantët shqiptarë do të vinin në mëmëdhe nga Mali i Zi, Greqia apo nga Maqedonia.
Kështu do të merrte hov edhe turizmi shqiptar, si një ndihmë të jashtëzakonshme për Kukësin, qarkun më të varfër të republikës dhe jo vetëm.
Kanë kaluar gjithë këto kohë dhe askush nuk u “kujdes” që të mendonte më, as për “Çunat e Londrës”, “çamarrokë ose jo” që do të vinin në aeroportin e Kuksit.
Askush nuk e di se kur ky aeroport do të kalojë në funksionin e tij të plotë duke pranuar linjat LowCost si aeroportet e tjera të rajonit.
Kushedi, përpara se të mendojmë këtë, Çunat “çamarrokë” ose jo të Londrës, duhet t’i kujtojnë ministres së rizgjedhur Balluku, thënien e kryeministrit Albin Kurti se; “duan të vijnë në Shqipërinë e Kastriotit dhe jo të Kastratit”.
