“Guvernatori dorëzon informacionin, por vetëm pjesërisht!! Sërish, terësisht i pamjaftueshëm. Madje madje i shoqëruar me kujdesin e veçante për të kërcënuar përmes “legjislacionit” mbi “sekretin bankar” dhe “sekretin shtetëror”, shkruan Braçe në Fejsbuk
Kryetari i Komisionit Parlamentar të Ekonomisë, Erjon Braçe, në një postim në rrjetin social Fejsbuk (Facebook) shkruan se “përgatitja për përballjen ligjore me drejtuesit e Bankës së Shqipërise, në kërkim të përgjgjesive administrative, vijon”.
Sipas Braçes, guvernatori Fullani ka dorëzuar informacionin të pjesshëm. “Guvernatori dorëzon informacionin, por vetëm pjesërisht!! Sërish, terësisht i pamjaftueshëm. Madje madje i shoqëruar me kujdesin e veçante për të kërcënuar përmes “legjislacionit” mbi “sekretin bankar” dhe “sekretin shtetëror”, shkruan Braçe.
“Tëresisht qesharak si veprim kur shihet qartë që dokumentat e dorezuar nuk përbëjnë “sekret” dhe janë “klasifikuar” kështu në kundërshtim me ligjin, me synimin e qartë që publiku të vijojë të mos dijë asgjë rreth paligjshmërisë në Bankën e Shqipërisë. Guvernatori Fullani dorëzoi dje pasdite në Kuvend, informacionin e kërkuar për: Organigramen e Bankës së Shqipërisë sipas funksioneve dhe përgjegjësive në linjën vertikale të drejtimit; Buxhetin e Bankës së Shqipërisë nga viti 2010 e në vijim; Raportin e Inspektorit të Përgjithshëm të Bankës së Shqipërisë nga viti 2010 e në vijim. Por Guvernatori Fullani refuzon të dërgojë në Kuvend informacionin e kërkuar për: Listën e punonjësve të Bankës së Shqipërisë, shoqëruar me funksionet për gjithësecilin; Kontratat e investimeve të lidhura nga Banka e Shqipërisë nga viti 2010 e në vijim, me vlerat respektive, afatet dhe kompanitë e kontraktuara (në Kuvend është depozituar vetëm një listë e kontratave, por pa informacionin e mësipërm); Raportet e tre grupeve të punës të ngritura menjëherë pas vjedhjes në Bankën e Shqipërisë, raporte që citohen në një deklarate të Këshillit Mbikqyrës e sipas të cilave Guvernatori dhe Këshilli Mbikqyrës nuk kanë shkelur ligjin në rastin e vjedhjes së bankës!! (sipas Guvernatorit raportet e grupeve të punës qënkan “sekret shteteror”, vijon Braçe.
Sipas deputetit socialist, “Guvernatori nuk dorëzon listën e punonjësve sepse insiston të mbrojë tërësisht nepotizmin, klientelizmin politik dhe klientelizmin e lidhur me interesa të biznesit, që është instaluar në Bankën e Shqipërisë e që është një nga problemet kryesore të degradimit nga pikpamja institucionale dhe përgjegjësive të institucionit”.
“E dyta, Guvernatori nuk dorëzon të plota kontratat e investimeve në Bankën e Shqiperisë sepse insiston të fshehë deri në fund paligjshmerinë në këtë segment të veprimtarisë së Bankës të klasifikuar me risk të lartë nga organet e kontrollit të brendshëm, inspektimit dhe Kontrollit të Lartë të Shtetit. E treta, Guvernatori nuk dorëzon raportet e grupeve të punës të ngritura pas vjedhjes në Bankën e Shqipërisë sepse kërkon të fshehë deri në fund çka ka ndodhur në Bankë në rastin e vjedhjes së zbuluar tashmë, kërkon të fshehë mekanizmin dhe përgjegjësinë e gjithë autoritetit komandues të Bankës, nga Guvernatori, zëvendësguvernatori, Këshilli, departamentet, përgjegjësit e sektorëve”, shkruan më tej Braçe.
“Ka edhe nje arsye të dyshuar që mund të jetë e mundshme. Ende në Banke nuk e dinë çfare ka ndodhur, kanë thjesht disa deponime të Ardian Bitrajt, të cilat ngjajnë më shumë me një dëshmi të rreme, alibi për të mos treguar të vërtetën deri në fund, siç ajo alibia e bixhozit”, shton Braçe.
Deputeti socialist shkruan më tej se “nuk kanë prova të çdo elementi të vjedhjes, pasi ato po të ishin, dëshmojnë qartë për përgjegjësitë në 4 vite vjedhje, ndërkohë që mungesa tamam e tyre tregon qartë përgjegjësinë në dështimin e sistemeve të administrimit, ruajtjes dhe kontrollit të vlerave monetare në tre arkat e Departamentit të Emisionit”.
“Kjo është gjendja. Ndërkohe ne vijojmë me përgatitjet për të çuar deri në fund detyrën në ballafaqimin me drejtimin e Bankës së Shqipërisë në Kuvend dhe publikisht”, përfundon Kryetari i Komisionit Parlamentar të Ekonomisë, Erjon Braçe.
