Ministria e Shëndetësisë ka përditësuar të dhënat e fundit mbi pandeminë e Covid-19 në vendin tonë, ku vërehet një ulje drastike e numrit të të infektuarve. Gjatë 24 orëve të fundit janë evidentuar 84 raste të reja me Covid-19, ndërkohë katër qytetarë kanë humbur betejën me virusin.
Sipas MSH-së, aktualisht në spitalin Infektiv dhe “Shefqet Ndroqi” po marrin trajtim 175 pacientë të konfirmuar pozitivë me Covid-19, ku 17 ndodhen në terapi intensive dhe nëntë të tjerë të intubuar.
Listës së të shëruarve i janë shtuar 97 qytetarë në 24 orët e fundit, duke e çuar numrin e të shëruarve në 5020, që nga fillimi i epidemisë. Për të tretën ditë radhazi, numri i të shëruarve është më i lartë se i rasteve të reja të konfirmuara me Covid.
Shpërndarja gjeografike e rasteve aktive sipas qarqeve:
Tiranë 2065
Durrës 525
Shkodër 284
Fier 142
Lezhë 191
Korçë 175
Vlorë 131
Kukës 136
Elbasan 162
Berat 80
Gjirokastër 41
Dibër 52.
Autoritetet shëndetësore kanë kryer deri tani 61214 testime të dyshuara, prej të cilave janë konfirmuar pozitivë mbi 9279 raste. Ajo që shihet si shqetësuese lidhet me rritjen e numrit të rasteve aktive, të cilat sipas Ministrisë së Shëndetësisë kanë shkuar në 3984.
Për shkak të Covid-19 deri tani kanë humbur jetën 275 qytetarë, kurse qarku me i prekur është Tirana, i ndjekur nga qarku Durrës dhe Shkodër.
Ministria e Shëndetësisë ftoi qytetarët të tregojnë kujdes, të mbajnë maskë në ambientet e mbyllura, të ruajnë distancën të paktën me 1.5 metra si dhe të shmangin pjesëmarrjet në ceremonitë festive dhe ato mortore.
Sipas saj, tubime të tilla janë kthyer në burim infeksioni që po dëmtojnë seriozisht jetën e qytetarëve.
