Pas takimit me kreun e LSI-së Ilir Metën, opozita i mbetet qëndrimit të saj për modelin e vendeve të rezervuara për emërimet në drejtësi. Kreu i demokratëve përsëriti zgjidhjen e ofruar nga Komisioni i Venecias, që sipas tij do të shmangte kapjen e sistemit të drejtësisë nga politika.
“Kemi kërkuar një zgjidhje jo tonën, por të ofruar nga partnerët tanë ndërkombëtarë, Shtetet e Bashkuara të Amerikës dhe Bashkimi Europian dhe të konsakruar nga Komisioni i Venecias si një zgjidhje e përshtatshme pë rtë shmangur kapjen politike të sistemit.”, u shpreh Basha. Kreu i demokratëve e konsideroi një takim me vlerë atë me Ilir Metën.
“Mund të them se takimi i sotëm pati një vlerë si çdo dialog që bëhet jo për sy e faqe por për të kërkuar mbi të vërtetën, rrugët e daljes, rrugët e zgjidhjes” tha Basha, i cili zbuloi një kërkesë të opozitës për aleatin e Edi Ramës.
“Paralelisht me Reformën në Drejtësi në Kuvendin e Shqipërisë minimalisht duhet të jetë në seancë, por shpresoj dhe besoj më përpara kur të miratohen edhe dy propozimet tona për votimin elektronik, biometrik dhe numërimin elektronik. Për këtë çështje, të dy, kryeministri dhe kryetrit i Kuvendit janë shprehur në parim dakord” tha Basha.
FJALA E PLOTË E LULZIM BASHES
Zonja dhe zotërinj, të dashur bashkëqytetarë,
Venecia ka folur qartë. Në opinionin e saj të ndërmjetëm dhe në opinionin e saj final ka dhënë formulën se si garantohet moskapja politike e sistemit të drejtësisë. Dhe Partia Demokratike prej shkurtit, siç bëmë të ditur nga kjo sallë të mërkurën e javës që po lëmë pas, e ka pranuar këtë zgjidhje e po kështu edhe bekimin e OPDAT dhe EURALIUS, siç u demonstrua qartë këtu edhe nga komunikimi shkresor që kjo parti ka pasur me këto dy partnerë në reformën për drejtësi. Për Partinë Demokratike, në stadin aktual të draftit të ndryshimeve kushtetuese, kjo është e vetmja çështje që ndan palët dhe në këtë çështje Partia Demokratike, opozita shqiptare, unë si kryetar i saj e kemi thënë qartë dhe e kam përsëritur të hënën. Jemi gati ta mbyllim këtë kapitull e të nisim me punën që na pret me 5 apo 7 ligjet e tjera që po kështu duhen miratuar me të njëjtën paketë, mundësisht Brenda këtij sesioni parlamentar. Asnjë alibi, asnjë vonesë, asnjë taktikë për të zvarritur këtë proces nuk ka bërë Partia Demokratike. Kemi kërkuar një zgjidhje jo tonën por të ofruar nga partnerët tanë ndërkombëtarë, Shtetet e Bashkuara të Amerikës dhe Bashkimi Europian dhe të konsakruar nga Komisioni i Venecias si një zgjidhje e përshtatshme pë rtë shmangur kapjen politike të sistemit.
Pata rastin ti shpjegoj edhe sot bashkëkryetarit të maxhorancës, kryetarit të Kuvendit z Ilir Meta, i cili më kërkoi ndjesë për incidentin e turpshëm të futjes në kalendarin e punimeve në mënyrë të paligjshme të Reformës në Drejtësi si një akt kriminal në kuptimin e falsifikimit dhe një akt kriminal në kuptimin e detyrimit të shqiptarëve të pranojnë pa konsensus, pa garanci një proces që do miratonte në mënyrë të njëanshme dhe me vota të trafikuara një draft të parakorduar dhe jashtë standardeve. Unë e pranoj ndjesën e kryetarit të Kuvendit por sot e gjithë ditën unë jam i bindur se ky ishte një akt politik i shëmtuar i një tentative të turpshme për të deligjitimuar Reformën në Drejtësi. Sikundër, i përsërita në takim, vendimin tonë tashmë të konsoliduar se nëse kërkohet bashkëbisedim, negocim, vullnet për të gjetur një zgjidhje të përbashkët gjithmonë në përputhje me Komisionin e Venecias, Partia Demokratike ka patur dhe vazhdon të ketë vullnet çdo ditë, çdo orë, çdo minutë, edhe të dielën, edhe ditën e ditëlindjes time. Sepse kjo është shumë e rëndësishme se një individ apo se një parti politike.
Por që të jetë produkti që kërkon çdo shqiptar duhet me patjetër të përputhet me opinionin final të Komisionit të Venecias dhe për këtë çështje ja çfarë thotë Komisioni i Venecias:
Paragrafi 88.
Me qëllim përgatitjen e tekstit përfundimtar, Komisioni i Venecias i rekomandon autoriteteve shqiptare që t’i kushtojnë vëmendje çështjeve të mëposhtme:
– Nëse palët në procesin politik nuk pranojnë shumicën e cilësuar të kërkuar për anëtarët jo gjyqtarë të KLGJ, KLP, KPK dhe DHSK, ata mund të zgjedhin një sistem proporcional që garanton përfaqësimin e opozitës mes organeve kolektive ose çdo model tjetër të përshtatshëm që do të siguronte ndikimin e opozitës në procesin e përzgjedhjes.
E zezë mbi të bardhë. Ky është arbitri. Për këtë kemi rënë dakord. Ky është autoriteti suprem mbi çdo autoritet tjetër europian apo global për ndryshimet kushtetuese në çdo vend anëtar të Këshillit të Europës. Arbitri ka folur. Partia Demokratike ka zgjedhur, e ka pranuar. Ata që nuk e kanë pranuar është maxhoranca. Ai që nuk e ka pranuar është kryeministri dhe sot e gjithë ditën barra e përgjegjësi për mos-avancimin në fazën tjetër të Reformës në Drejtësi që ka të bëjë me rakordimin e ligjeve, nuk është me atë që ka pranuar çfarë i ka servirur partnerit ndërkombëtar SHBA-ve, BE-së dhe çfarë ka sanksionuar Venecia, por është me atë që nuk e ka pranuar. Kaq e thjeshtë është. Të tjerat janë lojëra politike. Lojëra politike bizantine për të mos thënë ballkanase. Me gjithë respektin për këtë gadishull, për dashurinë e madhe që kam për traditën e moçme shqiptare, unë i përkas një formimi perëndimor. Dhe në bazë të këtij formimi perëndimor dua ti them sot çdo shqiptari që Lulzim Basha, siç e keni njohur në këto 10 vite, është dhe do të mbetet një person konstruktiv, i hapur, dialogues, negociues, i gatshëm për çdo kompromis në bazë të arsyes dhe përgjegjësisë që ka marrë përballë shqiptarëve. Jam totalisht i vendosur për të mos bërë asnjë kompromis mbi parimet që garantojnë moskapjen politike të drejtësisë, parime që nuk i kam shpallur unë por Komisioni i Venecias.
Ndaj, mund të them se takimi i sotëm pati një vlerë si çdo dialog që bëhet jo për sy e faqe por për të kërkuar mbi të vërtetën, rrugët e daljes, rrugët e zgjidhjes. Këtu vlerësoj posaçërisht qendrimin për një reformë në një proces legjitim. Si mund të shkohet në Europë, kush mendon se Europa mund ti hapë dyert një vendi parlamenti i të cilit së pari përjashtohet opozita dhe pastaj trafikohen mandatet?! Aq më shumë në këtë parlament që ka marrë damken e kriminalizimit nga kjo maxhorancë. Kjo është një gënjeshtër e madhe dhe në kurriz të shqiptarëve.
Ndaj sot duke shprehur vlerësimin për këtë qendrim të një procesi legjitim, unë përsëris edhe njëherë thirrjen për angahzim të menjëhershëm që sot, nesër, kurdoherë që pala tjetër të jetë e gatshme për të finalizuar të vetmen pikë që na ndan në miratimin në parim të draftit kushtetues, atë të zgjedhjes së organeve të reja të drejtësisë. Qendrimi ynë mbështetet në rekomandimet e Komisionit të Venecias në opinionin final të tij. Qendrimi ynë është përqafimi i zgjedhjes së ofruar nga Shtetet e
Bashkuara të Amerikës dhe Bashkimi Europian. Sa na takon ne, e kemi thënë fjalën tonë.
Nëse pala tjetër, nuk do ta kapë politikisht drejtësinë, siç mendon sot e gjithë ditën jo çdo demokrat përfshirë kryetarin e tyre dhe çdo opozitar, por jam i sigurtë një shumicë shqiptarësh, për ta vënë në shërbim të shullazëve, habilajve, kokëdhimave, për ta vënë në shërbim të spastrimit të dosjeve të korrupsionit nga CEZ tek aferat e tjera me koncensionet. Nëse me vërtet duan një gjyqsor të pastër nga korrupsioni që mund të hetojnë pa ndikim politik atëhere pse nuk e pranojnë zgjidhjen e ofruar nga Komisioni i Venecias?! Nëse përgjigja në kokën time është e njëjtë siç është në kokën tuaj sepse duan ta kapin politikisht, atëhere ju përsëris sot se Partia Demokratike nuk ka për të qënë pjesë kurrë e atij procesi dhe do ti kundërvihej me çdo mjet e me çdo forcë demokratike si një tentativë për të varrosur republikën e rrënuar nga krimi dhe korrupsioni. Por nëse duan ti provojnë shqiptarëve dhe faktorit ndërkombëtar se kjo nuk është axhenda e tyre, bujrum zotërisht të qeverisë, zgjidhjen e keni gati, Venecia ua ka dhënë, ne e kemi pranuar, mbeteni të thoni po vetëm ju.
Korrupsioni në drejtësi është pasojë, produkt, dhe jo shkak i korrupsionit politik ndaj dhe paralelisht me Reformën në Drejtësi në Kuvendin e Shqipërisë minimalisht duhet të jetë në seancë, por shpresoj dhe besoj më përpara kur të miratohen edhe dy propozimet tona për votimin elektronik, biometrik dhe numërimin elektronik. Për këtë çështje, të dy, kryeministri dhe kryetrit i Kuvendit janë shprehur në parim dakord. Ne dhe eskpertët po përpunojmë draftin dhe në rast të një rakordimi për Reformën në Drejtësi, pres që palët bashkarisht të kalojnë edhe këtë amendament të rëndësishëm që ti japë fund procesit të turpshëm të vjedhjes të votës, edhe manipulimit të numërimit dhe tu japë shqiptarëve demokracinë që meritojnë e që zgjedhin me votën e tyre të pandikuar në mënyrë kriminale e të pamanipuluar në procese numërimi të kontestuara.
Këto janë çështjet që diskutova sot me kryetarin e Kuvendit. Uroj dhe shpresoj që të jetë qartësuar edhe ai përsa i përket qendrimeve tona dhe që të përpiqet veç e veç dhe së bashku me ortakun e tij në qeverisje të ngrihet në lartësinë e pritshmërive të qytetarëve shqiptarë dhe faktorit ndërkombëtar. Se ku e kanë opozitën e vendit, e kanë fare të qartë. Fuqimisht në mbështetje në rekomandimin numër 88 të opinionit final të Venecias. Nuk kërkojmë asgjë më shumë, nuk pranojmë asgjë më pak.
Faleminderit!
