Reforma në drejtësi është temë kryesore e zhvillimeve në vend. Mes palëve politike prej ditësh ekziston një ngërç sa i përket draftit që do i paraqitet Komisionit të Venecias. Opozita kërkon që emërimi i zyrtarëve në sistemin e drejtësisë të bëhet me një votim prej 2/3-ave ndërkohë që ekspertët e lartë kanë vendosur për 3/5. Kjo është ajo që i ndan palët.
Lidhur me mosarritjen e konsensusit, ka reaguar kreu i PD-së, Lulzim Basha. Ai ka akuzaur z. Rama se po kërkon të bëjë pazar me konsensusin e kërkuar nga Komisioni i Venecias. Sipas kreut shefit të opozitës qëllimi i Ramës është kapja e sistemit të drejtësisë.
Statusi i plotë i z. Basha:
“Kush e quan pazar, konsensusin që kërkon komisioni i Venecias për reformën në drejtësi?
Tregtari i paskrupullt i politikës, spekulanti më i madh i pazareve më të pista në vend, ai që ka bërë pakt me krimin, themeluesi i aleancës së qelbësirave, ai që i zvarritej Nanos dhe i përkuljes Metës kur ia lypte nevoja dhe sa kalonte lumin ngrinte kurthe për ta, politikani që ska mbajtur një fjalë apo një premtim që ditën e parë e deri më sot.
E quan pazar konsensusin, njeriu që futi kriminelët në bashki, zyra publike e Parlament, erdhi me ta në pushtet e ndau pushtetin me ta.
E quan pazar konsensusin për drejtësinë, kumbari i pazareve me doganat dhe tatimet, me shullazët dhe habilajt, me tenderat dhe koncesionet, me papulët dhe carapulët, nushët e beqët.
Konsensusi që kërkon komisioni i Venecias, është rruga që e shpëton drejtësinë nga kapja politike. Konsensusi zhduk pazarin, është e kundërta e tij.
Pikërisht, kësaj i druhet Rama, ky është temjani që e tremb atë.
Sepse një drejtësi e pakapur është problem serioz për këtë që ndau me CEZ-in 600 milionë euro, për këtë që ka dhënë mbi 360 milionë euro koncesione miqve të tij. Është problem drejtësia e pakapur për përgjegjësin e 777 milionë euro vjedhje në tendera, për 400 milionë dollarë që u vodhën vjet në dogana.
Një drejtësi e pakapur do të ishte në anën e Qamil Zelës, Llazi Nasit, Gjovalin Lazrit, Arif Dodës, Bruna Mekës, Mark Brahimajt, Fluturim Cukut e shumë qytetarëve që korrupsioni, padrejtësia, arroganca e qeverisë dhe bandave të Edi Ramës u mori jetën.
E po kështu, një drejtësi e pakapur do të ishte problem për prengët, ndokët, bushët, roshët, pecët, ndonët e cubat e Edi Ramës, për kokëdhimët, tahirët, beqajt, ahmetajt e gjiknurët e për vetë kreun e bandës së 40 hajdutëve.
Dhe një drejtësi e pakapur, do të zhvlerësonte armën diabolike që ka Rama, dosjet dhe shantazhet që mban për aleatin e tij Meta dhe kundërshtarët brenda partisë a të korruptuarit e politikës kudo qofshin.
Kjo është e tmerrshme për Edi Ramën, ndaj ai këmbëngul të kapë me çdo kusht drejtësinë, edhe pse ashtu si Venecia edhe opinioni vendas e ndërkombëtar kërkon të kundërtën.
Referendumi është vërtet një mundësi e shkëlqyer. Referendumi e ka emrin zgjedhje të parakohshme, shansi që qytetarët të cilët me kohë e kanë grisur kontratën me Edi Ramën, të japin gjykimin e tyre përfundimtar për qeverisjen e tij të dështuar, të korruptuar dhe kriminale.”
