Institucionet duhet të kontribuojnë përmes pavarësisë dhe paanësisë së tyre, në procesin e auditit. Kështu ka deklaruar kreu i shtetit, Bujar Nishani gjatë konferencës shkencore të Kontrollit të Lartë të Shtetit, për auditimin publik të vendit.
Presidenti Nishani theksoi se vetëm përmes angazhimit dhe standardeve të institucioneve, mund të arrihet transparenca ndaj taksapaguesve.
“Institucionet duhet të jenë të ndërgjegjshme, që ky është një proces që nuk do të jetë i shkurtër, duhet të përfshihemi në proces dhe të kontribuojmë. Integrimi të arrihet me angazhim e gjithëpërfshirje. Puna dhe investimi do të kontribuojnë në përmirësimin e punës së mëtejshme të institucioneve. Vetëm përmes besimit dhe mirëbesimit, mund të arrihet pavarësia dhe paanshmëria. Performanca evropiane për institucionet shqiptare është shumë e rëndësishme”, tha kreu i shtetit Nishani.
Pjesë e kësaj konference ishte edhe Ambasadori amerikan, në Tiranë, Aleksandër Avizu, që vlerësoi arritjet e vendit ndaj korrupsionit.
“Një auditues i mirë tregon praktikat më të mira. Në një qeveri, një auditues i mirë është i pavarur dhe suksesshëm, pasi ata janë rojtarët që hedhin dritë mbi shpenzimet. Në Shqipëri, KLD është një administrues i rëndësishëm që mbikëqyrë financat dhe mashtrimet e mundshme në qeveri. Në luftën kundër korrupsionit Shqipëria ka ngritur një shembull të mirë, duke bashkëpunuar me anë të punës së përbashkët, dhe me KLD-në.
Kontrolli i Lartë i Shtetit ka qenë partner i përbashkët e hetimeve, në vitin 2012 iu referua 12 çështjeve. Kjo rritje ndodh për shkak të punës së madhe të bërë nga KLD që të zhvillohet si auditues modern”, tha gjatë fjalës së tij Arvizu.
