Metropolitani Amfilohije, aktualisht metropolitan i Kishës Ortodoskse serbe në Mal të Zi, ka thënë sot në Gazimestan me rastin e “Vidovdanit” se ka gojëdhëna për Millosh Obiliqin (Kopiliqin) që thonë se ai mund të jetë shqiptar, e disa thonë se është serb.
Ky fjalim i Amfilohijes i ka befasuar serbët e pranishëm sot në Gazimestan.
“S’ka rëndësi se kush ka qenë Obiliqi, rëndësi ka që ai sikurse edhe Gjergj Kastrioti – Skënderbeu kanë luftuar për të mirën e qytetarëve që kanë jetuar në këto treva dhe neve nuk duhet të na ndajnë heronjtë, por duhet të na bashkojnë ata”, ka thënë ai.
Sipas tij, shqiptarët dhe serbët gjithmonë kanë jetuar bashkë dhe e kanë luftuar bashkë të keqen.
“Edhe konflikti i fundit duhet të jetë një tregim për neve, që nuk duhet të luftojmë njëri tjetrin, por duhet të bashkëpunojmë në mes vete, sikurse që kanë bashkëpunuar Obiliqi dhe Skënderbeu kundër osmanëve”, ka përfunduar ai.
