Ambasadori i Kosovës në Britani të Madhe, Lirim Greiçevci, ka treguar detaje të reja lidhur me lulëkuqen dhe arsyen se pse disa njerëz e kanë vendosur këtë simbol të rrjetet sociale dhe nëpër rroba. Ai ka thënë se me këtë simbol përkujtohen të gjithë ushtarët britanikë të rënë nëpër luftëra. Kjo ditë shënohet në të dielën e dytë të nëntorit. Ndryshe, kjo ditë njihet si e “E Diela Përkujtimore”
Ky është sqarimi i Ambasadorit
Miq të nderuar, siç mund ta vëreni, në foton e profilit tim, unë kam vendosur një lulëkuqe, në shenjë respekti dhe përkujtimi për ushtarët britanikë, të rënë heroikisht në të gjitha luftërat deri më tani, prandaj e ndjej të nevojshme ta shpjegoj pak më gjerësisht kuptimin që ka ajo.
Në Mbretërinë e Bashkuar dhe në shtetet e Komonuelthit Britanik (53 shtete, ish koloni dhe të administruara nga Perandoria Britanike) çdo vit shënohet “E Diela Përkujtimore”, e cila bie në javën e dytë të nëntorit, afër datës 11 nëntor 1918, kur u arrit armëpushimi (fundi) i Luftës së Parë Botërore. Kjo ditë karakterizohet me ceremoni të shumta përkujtimore përmes vendosjes së kurorave me lule nëpër memoriale në mbarë vendin. Ajo kulmon me vendosjen e kurorave me lulekuqe në Londër nga ana e Monarkut britanik, anëtarëve të familjes mbretërore, Kryeministrit, Liderit të Opozitës dhe zyrtarëve të tjerë, si dhe me parakalimin e veteranëve të luftërave.
Lulëkuqja, si simbol i ngjyrës së kuqe të gjakut, të derdhur në frontet e luftës, daton që nga Lufta e Parë Botërore, ku nëpër fushat e Belgjikës dhe Francës kishin rënë shumë ushtarë britanik në istikame dhe nëpër të cilat kishin mbirë lulëkuqe gjithandej.
Legjioni Mbretëror Britanik, shoqatë bëmirëse, e cila iu ndihmon veteranëve të luftës dhe familjeve të tyre, organizon çdo vit aksionin humanitar të shpërndarjes së lulëkuqeve artificiale, në shkëmbim të donacioneve humanitare, të cilat mblidhen në dobi të veteranëve të luftës. Lulëkuqet barten për disa javë rresht nga politikanë, personalitete publike, gazetarë, estrada, etj si dhe njerëz të rëndomtë, deri në të Dielen Përkujtimore. Lulëkuqen, në shenjë respekti, miqësie dhe solidariteti me popullin britanik, e bartin edhe shumë diplomatë të akredituar në Londër. Në rastin tonë, në Kosovë ushtria britanike gëzon një respekt dhe mirënjohje të thellë, meqë ka zhvilluar luftë për çlirimin e Kosovës. Por, fatmirësisht, nuk ka pasur viktima në ushtarë.
Duke pasur parasysh se në Kosovë ekziston një numër i madh i veteranëve të luftës, të cilët kanë nevojë për mbështetjen tonë, do të ishte mirë që kjo iniciativë atraktive bëmirësie të përshtatet dhe të zbatohet edhe tek ne.express
Më shumë informata lidhur me lulëkuqen dhe Ditën Përkujtimore mund të gjeni në këtë webfaqe: http://www.britishlegion.org.uk/
