Protestuesit nuk u lejuan nga policia që të vendosnin një shirit të kuq si simbolikë e zonës së krimit në ndërtesën në rikonstruksion të Bankës së Shqipërisë disa metra larg sheshit “Skënderbej”
Tre protesta brenda 24 orësh organizohen në Tiranë për dorëheqjen e Guvernatorit të Bankës së Shqipërisë, Ardian Fullani. Protestuesit fajësojnë zotin Fullani për vjedhjen e thuajse 7 milionë dollarëve në Bankën e Shqipërisë.
Protesta të tjera zhvillohen në Tiranë për dorëheqjen e Guvernatorit Ardian Fullani për vjedhjen e 713 milionë lekëve, rreth 7 milionë dollarë në Bankën e Shqipërisë.
Fillimisht, për disa minuta, protesta e parë ishte e tensionuar mes organizatorëve të Aleancës Kuq e Zi dhe policisë.
Protestuesit nuk u lejuan nga policia që të vendosnin një shirit të kuq si simbolikë e zonës së krimit në ndërtesën në rikonstruksion të Bankës së Shqipërisë disa metra larg sheshit “Skënderbej”.
“Ata tentuan që të mos na lejojnë sepse i vret simbolika. Ata kanë menduar që shqiptarët harrojnë”-tha Kreshnik Spahiu, kryetar i Aleancës Kuq e Zi.
Zoti Spahiu iu drejtua me mospëlqimin e simbolikës kryeministrit Edi Rama, ministrit të Brendshëm Saimir Tahiri, për të cilin tha se “bën sehir” dhe sikurse shtoi shefave të tjerë të policisë:
“Rrethimit me shiritat e krimit aty ku zhvillohen tendera, ku vidhet, ku grabitet, ndoshta duke rrethuar qeverinë, Kuvendin e horrave, trafikantëve, që vetëm burra nuk janë, sepse ata janë zhburrëruar prej kohësh”
Disa fjalë zoti Spahiu i kishte për kryeministrin Rama, të cilit i tha se “gjymat e parave të tua i ke futur aksionerë në media për të blerë ekranet”, por që e nuk vëren me shqetësim sepse “shqiptarët e kuptuan këtë gjë dhe nisnë të veprojnë, nisën aksionin në rrjetet sociale”.
Sipas kryetarit të Aleancës Kuq e Zi, “sa herë socialistët vijnë në pushtet vidhet thesari” duke shtuar “këtë radhë me një kod ndryshe” duke nënkuptuar “Omerta”-në e mafias:
“Në Sicili kanë një kod që quhet onerta, kur mafia kryen krimin të gjithë heshtin. Mesazh të qartë kryeministrit shqiptar: Jep dorëheqjen! Homologu yt në Korenë e Jugut vetëm se nga dallgët u mbyt një traget dha dorëheqjen. Ti nuk mund të jesh rilindësi i shqiptarëve. Ti hesht se je shumë i vogël, pavarësisht nga trupi je i gjatë. Je i kompromentuar. Gojën ta kanë mbushur me para, me 500 euro dhe sot nuk ke kurajo të flasësh”.
Ai shtoi se sistemi bankar është vendosur në shënjestër për t’u grabitur dhe falimentuar:
“Dielli nuk mbulohet me shoshë. Për të shkëputur vëmendjen e shqiptarëve nga vjedhja e thesarit, mbylle universitetet, duke lënë atë të Anastas Angjelit”.
Protesta e tretë brenda 24 orësh zhvillohet përsëri nga veprimtarët e rrjeteve shoqërorë përpara zyrave të Guvernatorit të Bankës së Shqipërisë në sheshin “Avi Rustemi”.
