Shtatë ish-zyrtarë të Agjencisë Kombëtare të Burimeve Natyrore do të përballen me drejtësinë, pas një kallëzimi penal në Prokurori nga Kontrolli i Lartë i Shtetit, raporton “Ora News”.
Sipas kallëzimit të KLSH-së, kjo agjenci nuk ka punuar në interes të shtetit, por në dëm të tij. Bëhet fjalë për marrjen e punonjësve në të zezë dhe pa asnjë kusht sigurie.
Pas disa kontrolleve për vitin 2013, KLSH-ja ka konstatuar se subjektet e pajisura me leje për shfrytëzim rezultojnë të kenë prodhuar për çdo mineral, sasi të konsiderueshme në mijëra tonë, ndërkohë që numri i punëtorëve në këto subjekte varion nga 2-4 punonjës, fakt që dëshmon se në këto subjekte punohet “në të zeze”.
Shkelja pranohet edhe nga vetë AKBN-ja, me miratimin e programeve me nga 2 deri 4 punonjës me sigurim jete, ose ka dhe raste kur kërkohet minimumi dy punonjës të siguruar.
Sipas KLSH-së, AKBN-ja është vetëpërjashtuar nga rregullat për organizimin dhe funksionimin e administratës shtetërore dhe ka lejuar abuzimin nga ana e shoqërive koncesionare, të cilat gëzojnë leje shfrytëzimi.
Përveç abuzimeve me të drejtat e punëtorëve, këto kompani me miratimin e Agjencisë kanë shfrytëzuar pa kriter burimet nëntokësore, duke shkatërruar në shumicën e rasteve zonat mjedisore që ato shfrytëzojnë.
