Ministrja e Zhvillimit Urban dhe Turizmit, Eglantina Gjermeni ditën e sotme, inspektoi zbatimin e projektit të financuar nga Fondi i Zhvillimit të Rajoneve i cili po implementohet në qendrën e qytetit të Burrelit. Ministrja Gjermeni shoqërohej në këtë takim nga Kryetarja e Bashkisë Burrel, Adelina Farrici, prefekti i qarkut të Dibrës, Melaim Damzi dhe përfaqësues të pushtetit vendor. “Projekti për rehabilitimin e këtij parku, i finacuar nga Fondi i Zhvillimit të Rajoneve është i rëndësie të madhe jo vetëm për t’i dhënë qyetarëve të Burrelit shërbime më cilësore, por edhe për të nxitur turizmin e kësaj zone”, deklaroi Ministrja. Gjermeni foli edhe për mundësitë e mëdha për zhvillimin e turizmit në krahinën e Matit si një treve që ka të gjithë potencialin e nevojshëm për të aplikuar mbi të gjitha turizmin e aventurës duke u kthyer në një destinacion të preferuar turistik brenda vendit. “Kjo krahinë është e bekuar jo vetëm me bukuritë natyrore, por duke shtrytëzuar edhe traditën, mikpritjen, kostumografinë, kulinarinë mund të ktheht në një zonë ku të ketë turistë përgjatë gjithë vitit”, tha Ministrja Gjermeni. Ky projekt me vlerë investimi rreth 68 milionë lek, pritet të përfundojë para afatit të parashikuar, të marsit 2015. Ai parashikon rehabilitimin e godinave ekzistuese që do të përshtaten sipas funksioneve në projekt, ndërtimin dhe sistemimin e ujrave të bardha dhe të zeza, ndërtimin e fushave sportive, sistemimin e sheshit brenda parkut, ndërtimin e murit rrethues dhe ambienteve çlodhëse për të gjitha moshat. Ministrja e Zhvillimit Urban dhe Turizmit, Eglantina Gjermeni, e shoqeruar edhe nga kryetarja Farrici, inspektoi punimet në bllokun e banimit në lagjen “Pjeter Budi” dhe rikonstruksionin e fasadave në hyrje të qyteti, dy projekte të financuara nga vetë Bashkia Burrel. Vizita vijoi ne mjediset e Bashkise, përkatësisht në Zyren e Turizmit, ku Gjermeni u njoh me projekte që ka hartuar bashkia Burrel për zhvillimin e turizmit në rrethin e Matit.
