Qemal Dine: Më thanë jeni të padëshirueshëm, doja të shihja varret e të parëve
Problemet në kufirin mes Shqipërisë dhe Greqisë vazhdojnë prej vitesh të tëra, për shkak të toponimeve apo edhe të personave që kanë si vendlindje Çamërinë. Rasti i fundit ka ndodhur dy ditë më parë, në Pikën e Kalimit Kufitar në Sarandë, ku një 82-vjeçar, është kthyer me pretekstin se ka pasur të falsifikuar pasaportën. Por, Qemal Dine thotë se arsyeja e vërtetë e refuzimit të kalimit në Greqi ishte se vendlindja e tij ishte “Salicë-Gumenicë-Çamëri”. Qemali pretendon se pasaporta e tij është e rregullt, madje me të ka udhëtuar edhe në Itali, ku ka qëndruar një muaj e gjysmë.
Denoncimi
I moshuari është indinjuar së tepërmi nga ky episod, ku ka denoncuar publikisht veprimet e palës greke. “Nuk jam lejuar të vazhdoj udhëtimin drejt Korfuzit, menjëherë sapo pala greke ka hapur pasaportën time. Ndryshe ka ndodhur me vëllain tim, i cili ka qenë i pajisur me pasaportë italiane”, thotë Qemali, ndërsa ka shpjeguar edhe rrugëtimin e tij. “U nisëm nga Tirana, Fieri, vajtëm në Sarandë. Hipëm në traget dhe kur mbërritëm në Korfuz, na kontrolluan pasaportat. Unë e kam vendlindjen ‘Salicë-Gumenicë-Çamëri’. Edhe vëllai im e ka po kështu. Ata sa panë vendlindjen, ‘Selicë Çamëri’ thanë se do qëndroni këtu”, vijoi i moshuari. Ai është shprehur se policia i ka thënë shprehimisht se jeni të padëshirueshëm për të kaluar, duke i lënë me dy roje në traget për gjithë natën. “Jeni të padëshirueshëm për të kaluar’, na komunikoi policia. Më pas na dërguan në traget, na vunë dy roje, donim në mëngjes sot (dje) të dilnim për kafe, por nuk na lanë. Një censurë e paparë. Vëllai me pasaportë italiane u lejua dhe tani u kthyem në shtëpi”, shtoi ai. Megjithatë, në dokumentet zyrtare pala greke ka pretenduar se “kthimi është bërë pasi ka dokumente të falsifikuara”. I moshuari e rrëzon poshtë pretendimin e palës greke, pasi ka vizituar edhe shtetin italian, duke mos hasur asnjë problem.
Te varret e të parëve
Qemali thotë se ndihet i indinjuar nga veprimet e palës greke. Ai thotë se nuk ka shkuar në Greqi që prej 70 vitesh më parë, kur në moshën 11-vjeçare ka ardhur në Shqipëri, së bashku me familjarë të tjerë. Gjatë kësaj kohe nuk ka tentuar të shkojë në Greqi, për shkak edhe të burokracive. Tashmë, në moshë të thyer, donte të shihte edhe një herë vendin ku lindi, si dhe varret e të parëve të tij. “Unë kam vajtur edhe në Itali, në pasaportën time nuk kam asnjë pengesë. Kam ikur 11 vjeç nga Greqia dhe pas kaq shumë vitesh doja të shikoja varrezat e të parëve të mi, po nuk më lanë”, përfundon i moshuari.
Marrëveshja
Rreth 3 muaj më parë, në kuadër të përplasjeve të vazhdueshme, disavjeçare, mes Shqipërisë dhe palës greke, për sa i takon çështjes së toponimeve, ministri i Punëve të Jashtme, Ditmir Bushati, sqaroi marrëveshjen e arritur në Bruksel me zv/kryeministrin grek, Venizelos, posaçërisht për këtë çështje.
Në kuadër të kësaj marrëveshjeje vitin e ardhshëm, qytetarët do të lëvizin në përputhje me moratoriumin ekzistues, ndërsa shtoi se dy qeveritë janë të angazhuara që brenda 1 janarit të marrin të gjitha masat e nevojshme ligjore për ta zgjidhur përfundimisht këtë çështje. Bushati premtoi se do punohet për të lehtësuar mënyrën e përditshme për qytetarët tanë, pasi sipas tij, duhet bërë adresimi i të gjitha problemeve që bashkatdhetarët tanë kanë në vendet ku ata shtrinë dhe ndërtojnë jetët e tyre.
