Deputeti demokrat i qarkut të Vlorës thotë se: Koço ka këtë lloj pushteti prej të cilit ka pjellë një “monstër” si ajo e Sarandës, sepse perceptohet si miku i Kryeministrit Edi Rama
Deputeti demokrat i qarkut të Vlorës, Astrit Patozi, kërkon dorëheqjen e deputetit socialist të këtij qarku, Koço Kokëdhima. Në një opinion në gazetën Panorama, Patozi, komenton skandalin me punësimet në Sarandë, ku sekretari i deputeti socialist Koço Kokëdhima, në mënyrë flagrante premton një vend pune në administratë duke kërkuar seks me të mitur. Për këtë ngjarje, Patozi shprehet se dorëheqja e Kokëdhimës do të ishte minimumi i distancimit nga kjo politikë të cilën ai e konsideron perverse.
“Unë jam deputet i qarkut të Vlorës, pra edhe i Sarandës, ndaj edhe ndoshta më takonte të prononcohesha ndër të parët, menjëherë pas shpërthimit të skandalit me sekretarin pedofil të Kokëdhimës. Në fakt, bëra mirë që nuk fola në fillim. Sepse tani që të gjitha “palët” e kanë shprehur qëndrimin e tyre, është më e lehtë për të parë më qartë çfarë ka ndodhur”shprehet Patozi. Duke komentuar përgjegjësitë e deputetit soiclaist, Patozi shprehet se nuk akuzon Kokëdhimën apo Edi Ramën për personin e skandalit seksual në Sarandë, duke argumentuar se persona të tillë ka në çdo vend të Botës, por Patozi bën përgjegjës Kokëdhimën dhe kryeministrin për stimulimin e një metode antiligjore të funsksionimit të shtetit. “Natyrisht, nuk kam ndër mend të akuzoj Koço Kokëdhimën dhe aq më pak Edi Ramën se mund ta kanë nxjerrë monstrën në zyrat e PS që të ndajnë me të krevatin me prenë e mundshme. Por kjo nuk i shpëton dot dhe, aq më pak, i justifikon ata. Sepse të dy ata, jo në proporcion të drejtë, janë përgjegjës për instalimin e një pushtet pervers, i cili ka prodhuar dhe do të prodhojë përbindësha, të cilët, jo domosdoshmërisht mund të jenë pedofilë”, thotë Patozi.
Komenti i plotw i Patozit, botuar nw gazeta “Panorama”
Ja opinion i plotë i deputetit Astrit Patozi:
Unë jam deputet i qarkut të Vlorës, pra edhe i Sarandës, ndaj edhe ndoshta më takonte të prononcohesha ndër të parët, menjëherë pas shpërthimit të skandalit me sekretarin pedofil të Kokëdhimës. Në fakt, bëra mirë që nuk fola në fillim. Sepse tani që të gjitha “palët” e kanë shprehur qëndrimin e tyre, është më e lehtë për të parë më qartë çfarë ka ndodhur.
Natyrisht, nuk kam ndër mend të akuzoj Koço Kokëdhimën dhe aq më pak Edi Ramën se mund ta kanë nxjerrë monstrën në zyrat e PS që të ndajnë me të krevatin me prenë e mundshme. Por kjo nuk i shpëton dot dhe, aq më pak, i justifikon ata. Sepse të dy ata, jo në proporcion të drejtë, janë përgjegjës për instalimin e një pushtet pervers, i cili ka prodhuar dhe do të prodhojë përbindësha, të cilët, jo domosdoshmërisht mund të jenë pedofilë.
Po e shpjegoj më poshtë se pse. Për 8 vjet unë kam qenë zyrtari më i lartë politik i Partisë Demokratike në qarkun e Vlorës, por unë nuk kam pasur as zyrë deputeti dhe as sekretarë. Ndonëse isha përgjegjësi kryesor i çdo emërimi politik ose jo në administratën publike të qarkut njësoj siç, fjala vjen, duhet të ishte Edi Rama, si kryesuesi i listës së Vlorës sot. Sigurisht, kjo nuk më ka penguar të ushtroja i qetë detyrat dhe përgjegjësitë e mia. Nuk e di sa ia kam dalë, sepse mbetet ta gjykojnë të tjerët, por një gjë e them me siguri, kam qenë dhe vijoj të jem i qetë se kam bërë më të mirën e mundësive të mia dhe kam fjetur rehat.
Koço Kokëdhima, i cili zyrtarisht është vetëm njëri prej 8 deputetëve të Partisë Socialiste atje, ka disa zyra dhe shumë sekretarë. Disa media e konsiderojnë atë jo më kot si superdeputet. Ka edhe legjenda, që nuk dua t’i besoj të gjitha, për histori rrëqethëse emërimesh dhe çemërimesh në domenin e Koços.
Pyetja është: a është ky modeli tipik i administrimit të pushtetit nga PS? Do të isha i padrejtë po të thosha se PO. Sepse, ndonëse nuk e vë dot dorën në zjarr, nuk mund të them se këtë gjë bën edhe hierarku më i lartë politik i socialistëve, pas Edi Ramës, i cili është Gramoz Ruçi. Gjykoj se shefi i deputetëve të PS as ka mundësi, por as do ta ushtrojë këtë palo pushtet, të cilin Koço e ka ngritur në sistem. Por besoj se e njëjta gjë vlen edhe për shumicën e deputetëve të tjerë socialistë, për Namik Doklen, Eduard Shalësin, Ben Blushin, Fatmir Toçin, Blendi Klosin, Pandi Majkon, Arta Daden, Valentina Leskajn, Alfred Pezën e shumë të tjerë, se nuk i përmend dot të gjithë.
Po çfarë e bën Koçon të ketë këtë lloj pushteti prej të cilit ia ka arritur të paktën deri tani të pjellë dhe publikojë botërisht një “monstër” si ajo e Sarandës? Thjesht dhe vetëm se ai njihet dhe “perceptohet gjerësisht si miku dhe shoku i Kryeministrit Edi Rama.
Ndaj edhe unë jam në të drejtën time dhe në mbrojtje të interesave të publikut të tregoj gishtin mbi Kryeministrin dhe mbi partnerin e tij Koço Kokëdhima, si promotorët e lindjes së përbindëshave të tillë, si pedofili maniak i Sarandës, për shkak të mënyrës së mbrapshtë të administrimit të pushtetit të tyre.
Në Shqipëri, ashtu si kudo në botë, mund të ketë shumë persona me karaktere të deformuara, me probleme të rënda psikike apo edhe maniakë të sëmurë, por jo në çdo rast ata gjejnë terrenin për të shfaqur natyrën e tyre perverse. “Monstra” i Sarandës ishte 60 vjeç dhe ai nuk u bë i tillë në këtë moshë. Por ai gjeti terrenin ta shfaqë perversitetin e tij pasi u ndie i gjithëpushtetshëm. Por përse ndodhi kjo dhe pse guxoi ai? Sepse ai ishte miku i Koços, i cili nga ana e vet ishte aq hijerëndë, sepse ishte shoku apo partneri i Edi Ramës.
Dhe këtu është përgjegjësia e Kryeministrit, njësoj siç është edhe kabineti jopolitik, por tërësisht privat i qeverisë që ai kryeson.
Po, zoti Kryeministër! Pedofili i Sarandës është trimëruar thjesht dhe vetëm se e ka ndier veten Zot, kur ka parë se i tillë ishte për Sarandën dhe për gjithë qarkun e Vlorës edhe shefi i tij direkt, Koço Kokëdhima. Dhe kjo është thjesht dhe vetëm për shkakun tënd, sepse ti i ke falur Koços një pushtet okult, për të cilin askush nuk të ka votuar ty, e aq më pak Koçon.
Dhe kjo është po aq e rëndë sikur monstra të kishte dalë në zyrë për të gjetur vajza të vogla që të ndanin shtratin edhe me deputetin apo Kryeministrin, njësoj siç bënin Sadami apo Gedafi në vendet e tyre diktatoriale njëherë e një kohë.
Ndaj unë jam në të drejtën time t’i kërkoj, së paku, dorëheqjen Koço Kokëdhimës, si minimum i distancimit nga një politikë perverse që prodhon përbindësha si ai i Sarandës. Por kjo nuk është një provë për Koçon, nga i cili nuk pres shumë, por për mikun dhe shefin e tij, Edi Rama, i cili sot për fat të keq është Kryeministër i vendit.
Do të ishte gjithsesi një gjest i vogël që do të dekurajonte çdo të ngjashëm me Koçon (ndonëse Koço veç veten ka shok) dhe çdo të përafërt me monstrën e Sarandës, i cili jo domosdoshmërisht mund të jetë pedofil. Do të ishte të paktën një shenjë e zbehtë se përbindësha të tillë nuk do të kultivoheshin nën hijen e pushtetit të Kryeministrit, siç ka ndodhur deri më sot. Nëse kjo nuk ndodh, Edi Rama merr mbi vete jo vetëm përgjegjësi për këtë skandal, por mbi të gjitha, u fakton të gjithëve se qeverisja e tij reale ka dhe do të ketë si shëmbëlltyrë Koço Kokëdhimën.
Ndaj edhe socialistët më fanatikë duhet të harrojnë përrallat për reforma, për meritokraci, për drejtësi dhe shtet ligjor, por duhet të pyesin veten nëse janë të gatshëm që për të çarë në këtë sistem të sakrifikojnë edhe vajzat e tyre minorene për sekretarët e Koçove, që nga ana e tyre janë miqtë e ngushtë të Kryeministrit, dhe sido që të jetë, nuk u hyn gjemb në këmbë.
Po kështu, grupi i deputetëve të PS duhet ta ngulisë njëherë e mirë në mendje se vetëm një ose disa prej tyre mund të bëjnë ç’të duan me këtë pushtet, ndërsa të tjerët janë thjesht numërorë topi, të cilët duhen vetëm ditën e enjte për të ngritur kartonin, që të mos bjerë pushteti i pakufizuar i Koço Kokëdhimës.
Ka gati një muaj që po kërkohet largimi i Guvernatorit te Bankës së Shqipërisë për shkak të zbulimit të vjedhjes së rreth 7 milionë dollarëve. Gjithmonë për mua, Fullani është shumë më i pafajshëm se Koço, për rastin e vet. Edi Rama thotë se shoku i tij Kokëdhima dhe PS janë distancuar nga ngjarja, por publiku nuk ka asnjë provë reale për këtë. Për hir të së vërtetës, deklarimet irrituese të Kryeministrit dhe të deputetit të PS lidhur me ngjarjen i kanë ndihmuar shqiptarët ta shikojnë më qartë fenomenin e shëmtuar.
Po të bëjmë krahasimin, Fullani mund të mos e ketë njohur kurrë fizikisht hajdutin e 7 milionëve, dhe megjithatë i kërkohet, me të drejtë ndoshta, përgjegjësia, kurse Koço e ka emëruar me dorën e vet monstrën e Sarandës. Por ky i fundit gjen guximin që edhe në një ditë të tillë të sfidojë gjithkënd, duke u treguar gishtin të tjerëve, ndërkohë që është i zhytur deri në grykë në llumin e abuzimeve të rënda.
Po ku e gjen këtë kurajë Kokëdhima? Është fare e thjeshtë përgjigjja. Se është miku dhe shoku i Edi Ramës. Ndaj edhe kërkesa ime është minimaliste: Koço të ikë në punë të vet, sepse nuk i duhet as dreqit, as në Parlament, e aq më pak në Sarandë apo në qarkun e Vlorës. Ndërsa Kryeministri Edi Rama të distancohet prerë dhe qartë nga skandali dhe nga kjo mënyrë e pistë e administrimit të pushtetit. Kjo sa për fillim. Më vonë, të shohim.
