“Jemi në krah të ministrisë së Arsimit, bëhet fjalë për një trashëgimi. Të lumtur që kemi kontribuar në këtë projekt”-tha ambasadori amerikan Aleksandës Arvizu
Ambasada e Shteteve të Bashkuara thotë se është e lumtur që një projekt me rëndësi mundësoi pajisjen me mjedise të reja të Qendrës së Studimeve Albanologjike në Shqipëri.
Në profilin e ambasadës në rrjetin shoqëror “fejsbuk” (“facebook”) është publikuar një video 3,7 minutash që tregon se si kanë qenë mjediset e Qendrës së Studimeve Albanologjike në vitin 2012 kur ajo kërkoi ndihmë financiare si dhe të gjendjes së sotme të përmirësuar (https://www.facebook.com/usembassytirana?fref=ts).
“Dy vjet më parë, Qendra për Studimet Albanologjike në Tiranë aplikoi për grantin e Fondit të Ambasadorit për Trashëgiminë Kulturore nëpërmjet Ambasadës Amerikane në Tiranë. Propozimi kishte si qëllim që të ndihmonte në mbrojtjen dhe ruajtjen e 18,000 objekteve me vlerë shqiptare. Dy vjet më pas, ju duhet të shihni rezultatet që të besoni punën e madhe që është bërë!”-thuhet në postimin e ambasadës në fejsbuk.
Ambasadori Aleksandër Arvizu mori pjesë sot në ceremoninë e përurimit të mjediseve të reja të QSA-së.
“Jemi në krah të ministrisë së Arsimit, bëhet fjalë për një trashëgimi. Të lumtur që kemi kontribuar në këtë projekt”-tha zoti Arvizu në ceremoni.
“Projekti që përurojmë sot, – vijzoi ambasadori amerikan, – do të mbrohet dhe ruhet nga brezat si një investim jetik me fragmente të historisë së Shqipërisë që bart vlera të mëdha për të gjithë popullin”.
Ministrja e Arsimit dhe Sportit, Lindita Nikolla tha ndërkaq se takimi duhej parë si “mundësi e re për studiuesit, studentët dhe publikun e gjerë, kjo falë ndihmës se SHBA-së që nëpërmjet fondit që Arkeologjia Shqiptare të marë një standard të ri”.
Sipas zonjës Nikolla, kjo lidhet me cilësinë e arsimit sepse siç theksoi “mundëson studentët në vëzhgimin e tyre, por edhe standard për kërkuesit”.
“Ruajtja e Trashëgimisë Kulturore, na jep një mesazh të madh për ne që duhet të zhvillojmë përgjegjësi të reja, protagonizëm të ri, që sjellim jo vetëm një vlerë muzeale që duhet ruajtur, por dhe një pjesë të rëndësishme edukimi, njohëse për studiuesit, profesorët, publikun e gjërë”-u citua ministrja nga ATSH-ja.
E njejta agjenci citoi gjithashtu ministren e Kulturës, Mirela Kumbaro Furrxhi të thoshte në ceremoni se përurimi dhe vetë QSA-ja “përmban një dimension tjetër, jo thjesht të detyrës, por dimensionin e pasionit dhe dashurisë për trashëgimisë kulturore”.
Ministrja Kumbaro Furrxhi vërejti se në arkeologji, përgjegjësia është shumë e madhe, për t”i ruajtur dhe promovuar pasuritë.
“Në bashkëpunim me Insitutin e Arkeologjisë ne jemi duke përfunduar punimet në Muzeun Arkeologjik në Durrës, muzeu i madh Arkeologjik me më shumë se 300 arte fakte që nuk e kishin parë dritën e ekspozimit prej shumë vitesh”-tha ministrja e Kulturës.
Projekti, sipas ATSH-së, u realizua në kuadër të bashkëpunimit të Qendrës së Studimeve Albanologjike për Institutin Arkeologjik me ICOM Albania (Këshilli Ndërkombëtar i Muzeumeve) ku nga marrëveshja e nënshkruar (në shtator 2012) me ambasadën e SHBA-ve në Tiranë u përfitua një fond prej 103,389 dollarësh.
Ambasada amerikane mandej shpërndau njoftimin mbi këtë veprimtari me titullin “Ambasadori i SHBA Alexandër A. Arvizu Inauguron Ambjentet e Reja të Qendrës për Studime Albanologjike”:
Sot, Ambasadori i SHBA Alexander A. Arvizu, së bashku me ministrat Mirela Kumbaro dhe Lindita Nikolla dhe Drejtorin Ardian Marashi, mori pjesë në ceremoninë e inaugurimit të ambjenteve të reja në Qendrën për Studime Albanologjike, rinovuar me mbështetjen e Fondit të Ambasadorëve të SHBA për Ruajtjen e Kulturës.
Në vitin 2012 Fondi i dha një grant Zyrës së Këshillit Ndërkombëtar të Muzeve në Shqipëri për përmirësimin dhe rivitializimin e kushteve të ruajtjes së koleksionit arkeologjik.
Ky koleksion përfshin 18 mijë objekte, 16 mijë prej të cilave ishin të identifikuara si të rrezikuara nga dëmtimet, humbja apo shkatërrimi për shkak të kushteve të këqija të ruajtjes, sistemi i vjetër dhe i rrezikshëm elektrik, mungesa e kontrollit ambjental për rregullimin e temperaturës dhe lagështirës, dhe mungesa e një sistemi sigurie.
Vlera e projektit tw sapo pwrfunduar shkon në 103 mijë dollarë dhe rezultoi në rinovimin e plotë të ambjenteve të ruajtjes, studimit dhe ekspozimit. Këto rinovime do të mbrojnë koleksionet e paçmueshme të historisë dhe kulturës shqiptare nga shkatërrimi dhe dëmtimet dhe do të ndihmojnë në ruajtjen e këtyrë objekteve të vlerës së madhe për brezat e ardhshëm të studentëve, studjuesve dhe kërkuesve.
Fondi i Ambasadorëve të SHBA për Mbrojtjen e Kulturës u krijua në vitin 2001 nga Departamenti Amerikan i Shtetit për të mbështetur ruajtjen e vendndodhjeve dhe objekteve kulturore dhe formave të shprehjes së kulturave tradicionale në më shumë se 100 vende në botë.
Shqipëria ka përfituar nga ky program pothuajse çdo vit që nga krijimi i Fondit.
Objektet e rinovuara në të shkuarën me mbështetjen e këtij Fondi janë: Kisha e Shën Kollit, Voskopojë (2001); Kështjella e Lezhës (2002); Enciklopedia e Muzikës Iso-polifonike (2006); Kulla e Sahatit në Tiranë (2007); Koleksioni i objekteve të Muzeut Prehistorik (2008); Kështjella Romake në Grazhdan, Dibër (2008); Galeria në Kështjellën e Gjirokastrës (2009); Tuma e Kamenicës (2010); Ambjentet e Ruajtjes së Objekteve në Qendrën për Studime Albanologjike (2012).
