Të dyja palët kanë lajmëruar tubime sot në Shkup. Liderët politikë bëjnë thirrje për qetësi

Kur situata në Maqedoni duket se ka evoluar në një moment të ri, pasi ditën e sotme pritet një valë e re protestash, njoftuar këtë radhë nga të dyja palët, shqiptarët dhe maqedonasit, ka mbërritur dje më në fund edhe reagimi i Presidentit të Maqedonisë, Gjorgje Ivanov. “Ditëve të fundit jam në kontakt të vazhdueshëm me institucionet përgjegjëse rreth atyre protestave të dhunshme. Ne jemi në bashkërendim me të gjitha aktivitetet që kemi ndërmarrë. Gjithashtu, të gjitha shërbimet tona po kryejnë me përgjegjësi punën, ndërsa opinioni sigurisht do të njihet edhe me analizat tona. Protestat janë të lejuara ngado, megjithatë, dhuna askund nuk lejohet, andaj institucionet përgjegjëse të ndërmarrin gjithçka për të ndaluar dhunën. Të gjitha çështjet mund të zgjidhen përmes institucioneve”, deklaroi Presidenti Ivanov. Sipas tij, çdokush që dyshon në çdo aktivitet apo veprim të ndonjë institucioni, mund ta bëjë atë përmes rrugëve të parashkruara ligjore, duke përmendur në këtë rast dhe rastin “Monstra” dhe dënimin me burg të përjetshëm të gjashtë shqiptarëve. Gjithashtu, Ivanov nuk la pa përmendur e komentuar edhe protestat e fundit në Kosovë dhe djegien e flamurit maqedonas nga protestuesit e atjeshëm. “Aktet e tilla në Kosovë me djegien e flamurit, më së shumti dëmtojnë vetë ata. Të gjithë e dinë se çfarë bëri Maqedonia për të ndihmuar Kosovën që të arrijë shtetformimin e vet. Çdo akt i tyre i dhunshëm do të ndikojë në përfaqësimin e tyre në sytë e botës”, përmbylli Ivanov.

Dje ka pasur sërish reagime nga liderët shqiptarë në Maqedoni, të cilët veçmas kanë bërë thirrje për vetëpërmbajtje e qetësi. Përfaqësues të BDI-së dhe PDSH-së, pasi kanë akuzuar njëri-tjetrin për mospërfaqësim të shqiptarëve, kanë bërë thirrje që protestat të jenë paqësore dhe shqiptarët të mos bien pre e provokimeve.

Nga ana tjetër, grupime maqedonasish kanë reaguar ndërkohë kryesisht nëpërmjet rrjeteve sociale, ku në disa llogari në “Facebook” bëheshin thirrje të hapura radikale si “vdekje shqiptarëve” dhe nxiteshin maqedonasit etnikë, për të vepruar me akte konkrete për asgjësimin e shqiptarëve.

Po dje ka reaguar edhe qeveria e Kosovës, e cila me anë të një komunikate, thotë se “është duke i përcjellë me vëmendje zhvillimet e fundit në Maqedoni, duke shprehur shqetësim për rritjen e klimës konfliktuale dhe u bën thirrje të gjitha palëve që të veprojnë në mënyrë sa më të qetë dhe të kujdesshme, për të shmangur me çdo kusht një përshkallëzim të mëtejshëm të situatës”, duke folur më pas edhe për axhenda të fshehura të disa grupeve në protestë.

Gjithashtu, dje u vunë re disa deklarata polemizuese të politikanëve shqiptarë, artikuluar në rrjetet sociale, ku tentohej të vihej theksi te mosbarazimi i pozicionit të pakicës etnike maqedonase në Shqipëri, me rolin dhe pozitat shtetformuese të shqiptarëve në Maqedoni. Në sy ra sidomos reagimi i deputetit të PS-së, Erion Braçe, i cili, ndër të tjera, në reagimin e tij me këtë rast, shkruante se: Shqipëria i ka qytetarët shqiptarë me kombësi maqedonase, thjesht qytetarë të barabartë të Republikës së Shqipërisë, që jetojnë e kanë të njëjtat të drejta themelore, politike, ekonomike e sociale si çdo qytetar tjetër i këtij vendi, pa u cenuar e pa u diskriminuar në asnjë prej parimeve universale të gjithëpranuara!”, duke shtuar se “ne nuk i përdorim këta shtetas me kombësi maqedonase për të vjedhur vota! Partia e Kryeministrit Gruevski i përdori edhe për këtë! Sa turp! A. Plaka