Prend Mark Kajtazi, 21-vjeçar nga fshati Karashëngjergj, që ndodhet afër Zymit të Hasit të Prizrenit i ka dhënë fund jetës, ndërsa është gjetur nga babai i tij i varur në litar në orët e hershme të mëngjesit.
Viktima është gjetur i varur në një pemë përballë kishës katolike në fshat, rreth orës 06 të mëngjesit të së dielës, ndërsa njoftohet se prindi që kishte hasur i pari të birin e pajetë, afër tij kishte gjetur edhe një letër lamtumirës.
Drejtori i Policisë rajonale në Prizren, Nexhmi Krasniqi, konfirmoi rastin për “Zërin” ndërsa tha se Policia ishte njoftuar nga prindi i viktimës, ndërsa njësitet hetuese në vendin e ngjarjes kanë gjetur trupin e pajetë.
Ai tha se sipas raporteve fillestare, babai i të ndjerit ka deklaruar se nuk ka ndonjë ide për atë që mund ta ketë çuar në ndërmarrjen e këtij veprimi të birin e tij.
Për hetimin e rastit përveç hetuesve dhe krim-teknikës të pranishëm në vendngjarje ka qenë edhe prokurori i Shtetit.
Mbështetur në raportet policore, në rajonin e Prizrenit, megjithëse duket se krahasuar me disa vite të mëparshme, kohët e fundit rastet e atyre që i japin fund jetës me vetiniciativë janë zvogëluar, prapëseprapë vlerësohet se ato janë në kuota të larta.
Mbështetur në shënimet zyrtare të Policisë në Prizren, del se në vitin 2013 janë regjistruar 10 raste të vetëvrasjes apo gjashtë më pak sesa në vitin 2012, kur në këtë formë jetën e përfunduan 16 persona, të grupmoshave e të gjinive të ndryshme.
Duke ju referuar të dhënave nga raportet për këto raste, zëdhënësi rajonal i Policisë në Prizren, Hazir Berisha, tha për “Zërin” se në të shumtën shkaktar kryesor, që ka shtyrë viktimat në vetëvrasje është gjendja sociale dhe mosmarrëveshjet, përfshirë ato në familje, në dashuri, si dhe motive të tjera.
Sipas raporteve policore, del se meshkujt kryesisht i kanë dhënë fund jetës përmes armës së zjarrit apo duke u varur në litar, ndërsa femrat duke konsumuar sasi të tepërta të medikamenteve mjekësore apo preparate kimike të amvisërisë, kryesisht shampo për banjo “domestos”.
