Objektivi i politikës së jashtme amerikane për Ballkanin Perëndimor mbetet stabiliteti dhe integrimi i rajonit në Bashkimin Europian.
I emëruari i ri i Uashingtonit për Ballkanin Perëndimor Gabriel Escobar njoftoi dy objektivat. Zëvendësndihmës Sekretari për Çështjet e Europës dhe Euroazisë në Departamentin amerikan të Shtetit ka folur pas herë të parë pas emërimit në detyrë. Ai thotë se qasja e administratës amerikane ndaj rajonit nuk ka ndryshuar.
“Administrata e re do te fokusohet shumë në mesazhin që rajoni duhet të jetë pjesë e BE-së dhe të ndërmarrë reformat e nevojshme për këtë hap. Ne shohim mundësi të jashtëzakonshme ekonomike për rajonin”, tha Escobar
“Ne do të mbështesim përpjekjet e BE-së për diaologun Kosovë-Serbi për të zhvilluar marrëdhënie më të ngushta dhe pastaj për të hyrë së bashku në BE”, vijoi ai.
Përfaqësuesi i posaçëm i Bashkimit Europian në dialogun Kosovë-Serbi, Mirosllav Lajçak foli për fuqizimin e bashkëpunimit ndërmjet BE-së dhe SHBA-së në raport me dialogun Kosovë-Serbi.
Zyrtarët e lartë të BE-së dhe SHBA-së theksojnë bashkëpunimin trans-atlantik për dialogun Kosovë -Serbi për faktin se ndërmjet viteve 2018-2020, ndërkohë që dialogu i ndërmjetësuar nga BE-ja ishte pezulluar, administrata e atëhershme amerikane kishte filluar një proces paralel ndërmjet dy vendeve, i cili kulmoi me arritjen e Marrëveshjes për normalizimin e raporteve ekonomike mes Kosovës dhe Serbisë më 4 shtator 2020.
BE shprehu rezerva për marrëveshjen, por Escobar tha se ajo vazhdon të jetë e vlefshmne dhe se përmes saj, administrata amerikane po mundohet që të krijohet mirëbesimi mes palëve në aspektin ekonomik.
