Faruk Mujka, i ka thënë “Zërit” se strukturat paralele të kryetarit të Mitrovicës së Veriut, Goran Rakiqit, kanë hequr dhe kanë përdhosur tabela me emrat shqip në to, të vendosura në rrugët e Suhadollit, i cili është i banuar me shumicë shqiptare. “Është edhe një tentim për provokim të situatës në veri të Mitrovicës. Goran Rakiq na paska dënuar me vënien e tabelave me emërtime të rrugëve në gjuhën shqipe në rrugët e Suhadollit, duke thënë se kjo është e papranueshme dhe e kundërligjshme. Por nuk paska treguar se ato tabela i kanë larguar dhunshëm strukturat e tij paralele duke i përdhosur edhe emrat të cilët ishin vendosur në ato tabela”, ka thënë nënkryetari Mujka.
Mujka theksoi se dëshiron t’ia përkujtojë Rakiqit dhe mentorëve të tij se është vendim i çdo komune që emërtimet në tabela të shkruhen në origjinal në gjuhën zyrtare, aq më shumë kur ajo është me shumicë dominuese shqiptare.
