Demonstrata pasoi marrëveshjen ndërmjet institucioneve paralele të Kosovës në atë kohë dhe Qeverisë së Serbisë për kthimin e nxënësve shqiptarë në objektet shkollore.
Kjo marrëveshje ishte nënshkruar në vitin 1996 me ndërmjetësimin e ‘Shën Egjidio’ nga Vatikani, por e cila nuk gishte zbatuar asnjëherë.
Në atë kohë, nxënësit shqiptarë ishin të përjashtuar nga objektet arsimore në të gjitha nivelet dhe ata kishin krijuar sistemin paralel duke zhvilluar mësim në objekte private, raporton lajmi.net.
Me rekomandim të tyre, të gjithë studentët kishin veshur këmisha ose bluza të bardha si shenjë paqeje dhe bartnin pankarta ku kërkohej lirimi i objekteve të uzurpuara arsimore.
Demonstrata studentore ishte paqësore, por u kthye në të dhunshme pas ndërhyrjes brutale të forcave serbe.
Në ballë të saj ishin Rektori Ejup Statovci, drejtuesit e UPSUP-së me kryetarin Bujar Dugolli, e anëtarët e kryesisë Muhamet Mavraj, Albin Kurti e Driton Lajçi.
Por ku janë sot pesë personat e kësaj fotografie ikonë?
Rektori Ejup Statovci
Në mbledhjen e mbajtur të Kuvendit të Universitetit të Prishtinës më 26 nëntor 1991 u vendos që mësimi në gjuhën shqipe të organizohet jashtë lokaleve legale që ishin uzurpuar nga administrata dhe policia serbe. Në këtë kohë zgjidhet edhe rektori i ri i Universitetit të Prishtinës, prof. dr. Ejup Statovci. I tërë procesi mësimorshkencor që nga dhjetori i vitit 1991 organizohet mbështetur në dispozitat ligjore që ishin nxjerrë nga institucionet e Kosovës. Statovci vdiq me 19 tetor 1999.
Bujar Dugolli
Pas çlirimit, ish kryetari i UPSUP-së, Bujar Dugolli, hyri në politikë duke u bërë një figurë e njohur në kuadër të AAK-së. Ai ishte deputet e ministër i Tregtisë dhe Industrisë. Më vonë, Dugolli krijoi edhe iniciativë qytetarë e iu bashkua PDK-së, kurse aktualisht është tërhequr nga sfera e politikës por t’iu kushtuar jetës akademike. Ai tash është dekan dhe ligjërues në UP.
Driton Lajçi
Driton Lajçi, njëri nga ish anëtarët e kryesisë së UPSUPS-së, pas çlirimit gjithashtu hyri në politikë duke u bërë deputet i PDK-së. Më vonë ai mbajti disa funksione të ndryshme në Qeveri ku më i shpeshti ishte ai i këshilltarit. Aktualisht është profesor.
Muhamet Mavraj
Njëri nga ish pjesëmarrësit e demonstratës studentore të 1 tetorit 1997, nuk ka qenë asnjëherë zyrtarisht pjesë e ndonjë partie politike. Ai që nga paslufta ka filluar ta nxjerrë në botim gazetën e përditshme Epoka e Re e cila edhe më tej vazhdon të mbetet prezentë në tregun medial kosovar.
Albin Kurti
Gjatë luftës, ish student Albin Kurti ishte arrestuar nga forcat serbe dhe ishte mbajtur në burg deri në çlirim të vendit. Pas trysnisë ndërkombëtare, Serbia e ka liruar. Me t’u kthyer në Kosovë ai kishte filluar jetën e tij aktive në atë kohë në kuadër të KAN-it, një organizatë që mblidhte rreth vetës organizata joqeveritare e më pas ka themeluar Lëvizjen Vetëvendosje. Kurti tash me partinë e tij është një nga zërat opozitarë në Kuvendin e Kosovës./lajmi.net
