Kështu vlerëson njohësi i sigurisë, Naim Maloku, sipas të cilit qytetari i thjeshtë nuk mund të ndihet i sigurt kur institucionet e rendit nuk janë po ata që munden t’i sigurojnë qytetarët e Kosovës.
Ai shpjegon për lajmi.net se në këto raste kanë dështuar Policia e Kosovës, AKI-ja përfshirë dhe hetuesinë.
“Që sa ndodhin këto raste, sikurse në Kuvend e Qeveri, tash kjo e sodit dhe asnjëra nuk po zbardhet, as motivet e as kush qëllon pas këtyre. Përderisa nuk zbardhen motive dhe aktorët kush i ka kryer këto akte, ndaj institucioneve të Kosovës, atëherë normalisht që qytetarët duhet të jenë të shqetësuar kur institucionet përkatëse të sigurisë nuk e mbrojnë vetën qysh mundem më mbrojt qytetarin”, thotë njohësi i çështjeve të sigurisë, Naim Maloku.
Ai insiston se është papërgjegjësi e organeve të rendit dhe hetuesisë që nuk zbardhen këto dhe siç vlerëson Maloku, ka shumë të tilla që kanë mbetur të pa zbardhura.
“Institucionet e sigurisë nuk janë po ata që munden t’i sigurojnë qytetarët e Kosovës. Kur ata nuk mund ta sigurojnë vetën, nuk mund ta mbrojnë ta sigurojnë as qytetarin e thjeshtë të Kosovës.
Vendi, kohët e fundit është përballur shumë shpesh me situata të ngjashme, sidomos cak i këtyre sulmeve vazhdimisht kanë qenë institucionet e vendit.
Kurse sot gjatë ditës, u raportua se në zyrën e Administratës së Pensionale të Kosovës, te ndërtesa e ish-Rilindjes në Prishtinë, është gjetur një mjet shpërthyes.
Zyra e Administratës Pensionale të Kosovës ndodhet në oborrin e ish-pallatit të shtypit që sot shfrytëzohet nga Qeveria e Kosovës për ministri të ndryshme, në qendër të Kryeqytetit.
Deri më tani, Policia e Kosovës nuk ka arrestuar asnjë person të dyshimtë për këtë ngjarje.
