Në atë kohë, Ministria për Dialog, pati reaguar lidhur me marrëveshjen e Brukselit për njohjen reciproke të sigurimeve të automjeteve.
Qeveria kishte dalë me një kumtesë për media, ku ndër të tjera, kishte sqaruar përfitimet për qytetarët dhe shtetin nga Marrëveshja e Brukselit për njohjen reciproke të sigurimeve të automjeteve.
Ndër të tjera, aty ishte thënë se marrëveshja për sigurimin e automjeteve nuk trajton çështjen e targave të automjeteve, por vetëm çështjen e njohjes e policave të sigurimeve të automjeteve mes dy shteteve, Kosovës dhe Serbisë.
“Çështja e targave/tabelave të automjeteve është pjesë e Marrëveshjes për lirinë e lëvizjes të arritur më 2 korrik 2011, me ç ‘rast pala serbe ka pranuar që të lejojë kalimin nëpër territorin e shtetit të saj vetëm të automjeteve me targat KS”, kishte deklaruar Ministria, raporton lajmi.net.
“Nndërsa edhe për kundër trysnisë tonë dhe të BE-së ende nuk i pranon targat e automjeteve me regjistrimet RKS dhe kjo për arsye të pastra politike edhe pse arsyetimi i palës serbe ka qenë se këtë nuk mund ta pranojnë për shkak se mund të jetë e ‘rrezikshme’ kalimi nëpër territorin e Serbisë me targat RKS”, kishte thënë Ministria për Dialog që drejtohej nga Ministrja Edita Tahiri.
Madje ishte thënë se Marrëveshja për Lirinë e Lëvizjes bazohet në parimin e reciprocitetit dhe ia njeh të drejtën edhe palës kosovare që automjeteve me targat të shtetit serb tu kërkohet që t’i zëvendësojnë ato me targa ‘provuese’.
“Por ne nuk e kemi zbatuar atë pikë, që të dëshmojmë se jemi njëmend për lëvizje të lirë dhe të eliminojmë pengesa dhe pagesa shtesë sidomos për qytetarët e Luginës së Preshevës”, raporton lajmi.net.
Masa e reciprocitetit nga Kosova nuk u ndërmor asnjëherë, por ndërkohë sot (e enjte, 8 shtator 2016), Ministria për Dialog deklaroi se ka arritur që ketë një marrëveshje me masa të reciprocitetit.
Kështu, tash e tutje, vozitësit e automjeteve që shkojnë nga Kosova në Serbi dhe ata të Serbisë që hyjnë në Kosovë, nuk do t’i ndërrojnë targat, edhe pse këtë gjë deri më tash e kanë bërë vetëm qytetarët e Kosovës.
Tash e tutje, qytetarët do t’i mbulojnë gjysmat e targave me letra të bardha. Por a kanë menduar në këtë rast palët për sigurinë e qytetarëve, apo vetëm për aspektin juridik?!
Nëse arsyetimi ishte se automjetet e Kosovës nuk mund të kalojnë nëpër Serbi shkaku i akronimit RKS në targa (Republika e Kosovës), tash me letra të bardha ato do të jenë edhe më të dukshme dhe do të dallohen madje nga largësia.
Kjo do të jetë shumë më lehtë t’i identifikojë se automjetet e caktuara janë me targa të Kosovës apo Serbisë, kjo pasi bazuar në modelin grek-maqedonas, tabelat e automjeteve duken nga shumë metra largësi!!
