Arrestohet në Fier, autori, që vrau kushurin e tij në Greqi, Vladimir Murrizin. Policia e Fierit ka zbardhur vrasjen dhe i ka vënë prangat Denis Zakës, 26 vjeç, i cili ka pranuar se ishte autor i vrasjes së Vladimir Murrizit.
Interesant në këtë histori mbetet fakti se për të mbuluar gjurmët, autori sëbashku me babanë e viktimës, Mersin Murrizin, e kanë denoncuar vrasjen e Vladimirt në Greqi tek Krimet e Rënda në 7 gusht.
Policia e Fierit njoftoi se “më datën 7 gusht 2016, është paraqitur në Sektorin e Hetimit të Krimeve të rënda shtetasi Mersin Murrizi i cili ka kallëzuar se djali i tij Vladimir Murrizi është vrarë në Greqi, duke sjellë edhe si dëshmitar, shtetasin Denis Zaka, kushëririn e parë të tij me të cilin ka qenë bashkë në Greqi.”
Policia ka marrë në pyetje rrethin e të njohurve e ndërmjet tyre edhe Denis Zakën. Sipas saj, Zaka ka ngjallur dyshime gjatë marrjes në pyetje. Dëshmitë e tij ishin kontradiktore dhe nuk kishte përputhje ndërmjet të thënave të tij dhe tabulateve telefonike:
“Lidhur me kallëzimin, – thuhet në njoftim, – policia e Fierit kreu veprimet procedurale si: pyetja e katër personave që kanë dijeni për veprën penale, u bë këqyrja e telefonave, tabulateve, SMS-ve dhe rrjeteve sociale me të cilët kishte komunikime. Nga kryerja e veprimeve procedurale, bluve të këtij qyteti i lindën dyshime të bazuara se ishin para një krimi, vrasje dhe se i dyshuar ishte shtetasi Denis Zaka, kushëriri i parë i tij.
U intervistua shtetasi Denis Zaka, i cili kishte shumë kontradikta në thënie që nuk përputheshin me tabulatet telefonike. I vendosur para provave kontradiktore për ato që kishte deklaruar, pranoi se ai e kishte kryer vrasjen e kushëririt të tij, shtetasit Vladimir Murrizi, duke dhënë shpjegime të hollësishme për motivin, mjetin me të cilin kishte realizuar vrasjen, dhe vendin ku e kishte fshehur kufomën në Greqi
Policia e Fierit bashkëpunoi me Drejtorinë për Krime të Rënda dhe Interpol Tiranën. Të gjitha të dhënat iu përcollën menjëherë autoriteteve policore greke, të cilat nga ana e tyre shkuan në vendin e ngjarjes dhe gjetën kufomën e groposur. Për këtë arsye, me datën 8.08.2016, u bë ndalimi i shtetasit Denis Zaka, 26 vjeç, lindur në Lushnje dhe banues në lagjen numer 15, Durrës.”
