Deklaratat e Ramës se koha ka përfunduar dhe socialistët do ta çojnë draftin e reformës në Kuvend, kanë ngjallur një sërë pikpyetjesh.
Megjithëse ata morën bekimin e nderkombëtarëve për një hap të tillë, madje duke u hapur dhe dritën jeshile për rekrutimin individual të deputetëve të opozitës, futja klandestine e këtij projekti ne kalendarin e punimeve të Kuvendit për tre javët e ardhshme u ka lënë vend dilemave. Sa vota ka shumica?
Sipas disa llogarive, nga 94 vota që duhen për të kaluar reformën, në rastin më të mirë Rama do të ketë nevojë për 3 vota, ndërsa në rastin më të keq për 7 të tilla.
Aktualisht, Partia Socialiste ka 61 deputetë. Kështu që socialistëve së pari u duhet urgjent edhe vota që do të vijë me zëvendësimin e vendit të lënë bosh nga Koço Kokëdhima, me deputetin Edmond Leka.
Së dyti, shtrohet pyetja: a mund të votohet një reformë që mban vulën e SHBA dhe BE nga deputetë që janë jashtë grupit të PS-së, si Tom Doshi dhe Armando Prenga? Prenga është ende në proces gjyqësor për akuzën e plagosjes dhe armëmbajtjes pa leje. Ai më parë ka deklaruar se do të qëndrojë jashtë parlamentit, deri sa gjykata të marrë vendim për të.
Nga ana tjetër, reforma ka në parim edhe 20 votat e deputetëve të LSI-së. Por nuk përjashtohet fakti që, duke ditur se Meta nuk është shumë i dashuruar me këtë reformë, të përsërisë lojën që bëri me rastin e hetimit ndërkombëtar të ÇEZ, kur vetë votoi pro dhe vuri disa lsi-stë të tjerë për të votuar kundër.
Më në dyshim janë 5 votat e deputetëve të PDIU, aleatëve të rinj të socialistëve. Dy prej deputetëve, Dashamir Tahiri dhe Tahir Muhedini janë më pranë PD sesa shumicës. Dy vota të tjera të mundshme për të votuar pro reformës janë edhe ato të kreut të PBDNJ-së, Vangjel Dule dhe atij të PDK-së, Nard Ndoka.
Pra në rast se maksimalizon me disiplinë dhe mungese të çdo parimi votat e saj, shumica arrin deri në 91 vota dhe i mbetet të peshkojë 3 vota të tjera në kampin opozitar. Por ndërkohë nga selia e PD janë shprehur qartë: pa konsensus ata do ta bojkotojnë këtë votim, do penalizojnë çdo deputet që del nga vatha dhe do te djegin unanimisht mandatet.
