Partia Demokratike ka depozituar në Ministrinë e Brendshme një listë me 130 emra të dyshuar se kanë rekorde kriminale. Opozita dyshon se këta persona kanë fshehur të kaluarën e tyre dhe duhet të verifikohen në kuadër të ligjit për Dekriminalizimin.
Në këtë listë përfshihen emra drejtuesish në polici, kryetarë njësish administrative, drejtues të Tatim-Taksave etj. Gazeta “Panorama” shkruan sot se në mesin e 130 emrave të dyshuar janë Kelmend Balili ish-kreu i Transporteve në Sarandë dhe Klodian Xhelilin, djali i ish- kryebashkiakut të Dibrës.
Në dokumentin zyrtar, kërkohet që informacionet të vendosen në dispozicion brenda një afati 20-ditor.
“Kërkojmë nga institucioni që Ju drejtoni: Materialet që disponon Ministria e Brendshme apo Drejtoria e Përgjithshme e Policisë së Shtetit që vërtetojnë se shtetasit e përfshirë në listën e mëposhtme janë dënuar me vendim gjykate në Republikën e Shqipërisë apo të gjykatave të shteteve të tjera, duke specifikuar numrin e vendimit të gjykatës, gjykatën që ka marrë këtë vendim, llojin e veprës penale për të cilën është dënuar nga gjykata, kohën kur është dënuar dhe masën e dënimit, të shoqëruara me fotokopje të vendimit të Gjykatës.
Gjithashtu, ju rikujtojmë detyrimin ligjor, mbështetur në nenin 17, pika 2, të ligjit nr. 8891/2002 ‘Për organizimin dhe funksionimin e Komisioneve Hetimore të Kuvendit’, detyrim i cili kërkon që organet kompetente, të cilat disponojnë këto të dhëna dhe dokumente janë të detyruara t’ia përcjellin zyrtarisht komisionit, sipas kërkesës së tij. Kurdoherë, mosplotësimi i këtij detyrimi mund të përbëjë edhe vepër penale sipas legjislacionit në fuqi”, thuhet në shkresën e deputetit Genc Pollo.
