Nga Nikoleta Kovaçi
Mateo Shaba është një i ri që shërben në një njësi vendore. Ai është përballur me një dukuri të çuditshme të përvetësimit të emrit, imazhit dhe të pozicionit të tij publik nga një person tjetër, i cili përdor një emër të zakonshëm dhe në emër të zyrtarit lokal, ai iu premton njerëzve vende pune. Historia e të riut që gjendet në një funksion publik ka rënë në duart e policisë dhe pas deklarimeve të Shabës është bërë e mundur të merren edhe të dhënat e para. Për pasojë situata është ndërlikuar edhe më shumë, kur oficerët e skuadrës së hetimit të krimit kibernetik kanë referuar të dhënat në prokurori dhe kjo e fundit i është drejtuar gjykatës për të dhënë një vendim për vijimin e hetimit jashtë vendit për rastin në fjalë. Në fakt kërcënimet dhe përvetësimet e të dhënave në “Facebook” dhe nëpërmjet “Facebook”-ut janë të shumta, ndërsa grupi që merret me këtë hetim është detyruar t’i drejtohet qendrës së kompanisë me anë të këtij vendimi gjykate. Personazhi që luan me personin që gjendet në grupin që administron Farkën në Tiranë nuk është gjendur nga policia, ndërsa priten të dhënat nga vetë “Facebook”.
Historia
Rreth dy javë më parë mësohet se Gjykata e Tiranës ka dhënë një vendim, me anë të të cilit i kërkon kompanisë “Facebook” që t’i dorëzojë policisë gjyqësore të Policisë së Shtetit shqiptar të dhënat e regjistrimit, si dhe IP nga ku është regjistruar një përdorues, i cili dyshohet se ka abuzuar me publikimin e fotove dhe statuseve në emër të një personi tjetër. Ky vendim i gjykatës mësohet se është dhënë në bazë të kërkesës së prokurorisë së Tiranës, e cila i është referuar kallëzimit të Mateo Shabës, 29-vjeçarit që është administrator i njësisë së Farkës. Sipas materialit kallëzues, një shtetas ende i paidentifikuar dhe që përdor një faqe në “Facebook” me emrin Ergi Sina, ka publikuar foto të kallëzuesit dhe statuse me anë të të cilave bëhej me dije se ofronin vende pune në institucionin ku punon kallëzuesi Shaba. Për shkak të funksionit publik që kryen, Mateo Shaba i është drejtuar menjëherë policisë dhe kjo e fundit ka marrë të gjitha masat për të vijuar gjurmimet. Nga të dhënat e policisë bëhet me dije se me emrin Ergi Sina janë vetëm dy djem të moshës së mitur, njëri diku rreth 15 vjeç dhe tjetri edhe më i vogël. Që të dy këta persona jetojnë në Tiranë dhe sipas policisë janë lehtësisht të verifikueshëm nga ana e tyre, ç’ka rezultuar se nuk është asnjëri prej tyre, pra që janë me të njëjtin emër dhe mbiemër.
Eksperti
Nga grupi i punonjësve të policisë, të cilët janë edhe specialistë të hetimit të krimit kibernetik pranë Policisë së Shtetit, bëjnë me dije se është e domosdoshme një kërkesë dhe vendim i tillë dhe madje bëhet me dije sa ka patur edhe raste të tjera për të cilat është kërkuar një angazhim i tillë hetimor dhe nga gjykata. Eksperti saktëson se kërkesa nis pikërisht nga vështirësia që haset nga ana e tyre, pra e grupit të policisë që merr edhe deklarimin e parë dhe më pas vijohet me prokurorinë dhe gjykatën. “ Sigurisht që firma e nisjes së një hetimi të tillë hidhet nga ana jonë. Janë çështje delikate dhe kërkojnë një angazhim të gjerë jo vetëm në hapësirë por edhe në kohë. Ne kemi patur edhe bashkëpunime të tjera me “Facebook”, ndërsa rasti i fundit që lidhet me një administrator lokal, është mbase më pak i dëmshmi nga ato që kemi verifikuar. Ne punojmë në grup dhe bëjmë shumë punë mbi një rast dhe në momentin që dorëzohemi, atëherë detyrohemi të shkojmë deri te ‘Facebook’, ku kompania sigurisht që përgjigjet dhe janë tejet bashkëpunues”.
