Nga Desada METAJ
Duket se Majlinda Bregun e kanë bezdisur komentet e fundit të medias që merren kryesisht me pamjen dhe veshjen e ish-ministres së Integrimit. Siç ndodh rëndom me politikanët shqiptarë që i shprehin mendimet në rrjetet sociale, sot ish ministrja ka postuar një status të gjatë në Facebook, ku përpiqet të tregojë dinamikën e zgjedhjeve presidenciale në SHBA nëpërmjet kandidates Hillary Clinton dhe….flokëve të saj.
Paksa e inatosur me gazetarët, politikanët (dhe biznesmenë, nje trinom që zonja Bregu i ka të pandashëm në këtë gjykim, ajo akuzon se janë ata thashethemxhinj që merren me flokët e grave, që nuk marrin shembull politikën amerikane por merren me veshjet e tyre. Që politika shqiptare, shoqëria, gjykimi apo mentaliteti është vite dritë larg asaj amerikane këtë të gjithë e kemi kuptuar dhe pa na e shpjeguar ish-ministrja Bregu.
Por që dhe modeli i politikanes që ka më shumë foto si modele se deklarata politike është shumë larg Hillary-s që 20 vitet e fundit ka të njëjtin model flokesh dhe me shumë rudha në fytyrë…..edhe këtë e kupton po kaq thjeshtë. Dhe për fat të keq modeli i vlerësimit për luk-un është tashmë fenomen i pashmangshëm edhe për median shqiptare dhe politikën tonë. Aq sa cdo të enjte një nga agjensitë kryesore në vend ofron foto të deputeteve gra, të veshjeve apo cantave të tyre, pak a shumë një lloj parade që për hir të së vërtetës merr dhe shumë klikime.
Asnjë nga të “ekspozuarat” nuk është ankuar ndonjëherë për këto foto, madje një sy i stërvitur dallon qartë dhe “pozat” e marra. E vetmja pakënaqësi mund të jetë ajo për ngatërresat e firmave të veshura apo për çantat e shtrenjta. Sepse gratë e politikës nuk harrojnë që veç kësaj të ankohen edhe për seksizëm. Jam e sigurt që është e njëjta qarravitje si për kuotat e grave në politikë, që sa më shumë rriten, aq më shumë e ulin cilësinë e politikës.
Sikundër jam po aq e bindur që një grua me imazh të kuruar është po aq e fortë dhe e zonja, sepse sharmi dhe bukuria kanë qenë gjithmonë një forcë e shtuar e debatit publik. Por kur masa tejkalohet, ateherë dhe qëllimi deformohet. Sepse kur mediat nisin të flasin vetëm për pamjen, ky nuk është vetëm problemi i medias që rend drejt klikimeve. Ndoshta është dhe kapërcimi në dukje i pandjeshëm që bëhet nga politika….tek thashethemet. Nga deklaratat dhe debati politik, tek vorbulla e marrjeve dhe dërgimit të mesazheve telefonike me “thashethemxhinjtë” e medias dhe biznesit.
Nga debati i brendshëm në parti, tek “konkursi” i bukurisë me gratë e politikës. Të nderuarat gra të parlamentit dhe politikës janë votuar dhe pëlqyer është si gra të pashme dhe të kujdesshme. Por pikë së pari ato janë zgjedhur për të bërë politikë, ndoshta jo të niveleve të zonje Clinton, por jo dhe atë të modeleve qesharakë të Berlusconit.
Kështu, më shumë politikë dhe më pak foto artistike do i bëjnë më mirë imazhit të politikaneve gra në Shqipëri, ku për një pjesë të konsiderueshme ardhja e pranverës shihet me shqetësim më shumë për të ardhmen e ngjyrave të garderobës se sa për reformën në drejtësi. Dhe për këtë nuk kanë pse të fajësojnë mediant, që së paku i mban ende në “tregun” e thashethemeve ndoshta jo për politikën e munguar që nuk mund të bëjnë, por për pamjen dhe veshjen. Që sigurisht është prapë më mirë se sa të harrohen në vorbullën e atyre që nuk lanë asnjë gjurmë në politikën e këtyre viteve të fundit.
