Vrasjet e bujshme, atentatet me C4 e deri te grabitjet spektakolare dhe të dyshimta të parave gjatë transferimit nga bankat për në Rinas, kanë qenë ngjarjet kryesore, sipas kryepolicit të Tiranës. Në rrëfimin e tij për gazetën “Shekulli”, Ervin Hodaj, prej rreth 9 muajsh në krye të Policisë së Tiranës,, tregon për dy ngjarjet më të vështira të këtij viti, që, sipas tij, lidhen me një shkallë të lartë vështirësie për të zbuluar autorët. Gjithashtu në rrëfimin e tij, drejtori i Policisë së Tiranës e vë theksin në dëshirën që edhe në vitin 2016 të jetë po kaq e lartë zbulueshmëria e vrasjeve. Ai premton se edhe dy grabitjet e bujshme të bankave janë afër zbardhjes, pasi policia po kryen një paralelizëm veprimesh dhe mendohet se ka provat e duhura. Ndërsa në lidhje me zbulimin e atentateve me tritol, kreu i Policisë së Tiranës iu kërkon ekspertëve anti-eksploziv më tepër përkushtim në vendin e ngjarjes, pasi aty sipas tij është edhe çelësi i gjurmimit të së vërtetës.
Cilat janë ngjarjet më të vështirë që nuk janë zbuluar nga policia e Tiranës gjatë vitit 2015?
Gjatë drejtimit tim në krye të Drejtorisë së Policisë Vendore të Tiranës, dy janë ngjarjet më të rëndë; grabitja e 3.8 milionë eurove në kryqëzimin e Qafë-Kasharit dhe atentati me tritol i efektivit të policisë ushtarake në rrugën e “Qelqit”, në zonën e Kombinatit. Këtë ngjarje kanë ndodhur në një hark të shkurtër kohor, por përsëri mund të them me bindje të plotë se jemi në rrugë të mbarë për t`i zbardhur ato. Ngjarjet që kanë impakt në publik dhe që janë më të vështira për t’u zbuluar nga ana policore, por edhe nga ana procedurale, janë ngjarjet me eksploziv. Për hir të së vërtetës këtë vit ka një ulje drastike krahasuar me një vit më parë, por përsëri zbulueshmëria, për shumë faktorë, pothuajse mbetet zero. Ka shumë vështirësi për të zbuluar një atentat me eksploziv, pasi provat shkatërrohen në momentin e shpërthimit, ndërsa autori nuk gjendet dhe largohet pa lënë gjurmë. Nga ana tjetër, personi që vendos të kryej një krim të tillë, qëndron gjithmonë në distancë, duke e aktivizuar mekanizmin shpërthyes me anë të një celulari dhe, prandaj e theksoj se, këtu duhet një punë më e madhe nga ekspertët anti-eksploziv për të mbledhur provat materiale në vendin e ngjarjes, të cilat më pas do të na çojnë në zbulimin e autorit.
Për grabitjen e 3.8 milionë eurove, deri ku kanë arritur hetimet dhe a mund të pohojmë se bëhet fjalë për të njëjtët grabitës që morën 2.5 milionë euro te banka afër stacionit të Trenit, më 13 shkurt?
Realisht është bërë një punë voluminoze e Drejtorisë së Tiranës e mbështetur edhe nga Drejtoria e Krimeve të Rënda. Kemi gjetur shumë prova në vendin e ngjarjes si makina e autorëve të grabitjes dhe më pas jemi duke shikuar rrugët që mund të kenë ndjekur grabitësit, si në momentin që i kanë bërë pritë autokolonës që transportonte para, po ashtu edhe mënyrë se si mund të jenë larguar nga vendi i ngjarjes. Mendoj dhe besoj se jemi në rrugë të mbarë, sepse kemi të dhëna shumë të forta për të mbërritur deri të autorët. Ndërsa për grabitjen e ndodhur më 13 shkurt në bankën e nivelit të dytë pranë Stacionit të Trenit, ne po i hetojmë paralelisht, por nuk kemi shumë të dhëna se këto dy grabitje mund të kenë lidhje të forta me njëra-tjetrën. Për mua si drejtues nuk më duket se është e njëjta “dorë” në të dyja grabitje, por më saktë do të flasim, kur të mbyllen hetimet dhe do të jenë ekspertët ato që do të bëjnë interpretimin e provave, nëse dy grabitjet janë kryer nga i njëjti grup kriminal.
Cilat do të jenë sfidat më të mëdha për policinë e Tiranës për vitit 2016?
Sfidat e policisë së Tiranës dhe të mijat personale për vitin 2016 do të fillojnë aty ku u mbyll viti 2015 pra; zbulueshmëria e atentateve me tritol. Duhet theksuar se, gjatë vitit që po lëmë pas, vetëm një rast të rëndë kemi, ku është dëmtuar personi me shpërthim, ndërsa pjesa tjetër e atentateve me eksploziv kanë ndodhur thjesht për shantazhe ndryshme ose dëmtim të automjetit. Unë dua që edhe në 2016 të kemi 100 për qind të zbulueshmërisë së vrasjeve, si në vitit 2015. Duhet përmendur ky fakt se Tirana ka pasur numri më të ulët të vrasjeve në këto dy dekadat e fundit dhe për këtë gjë më bën të ndjehem mirë. Dy kanë qenë ngjarjet më të rënda për 2015 në kryeqytet; vrasja e trefishtë të bulevardi “Zogu i Parë” dhe vrasja e dyfishtë që ndodhi te lulishtja e “1 Majit”. Në të dyja rastet autorët janë kapur në kohë rekord, duke mbledhur të gjitha provat dhe faktet dhe më pas janë dërguar përpara drejtësisë për veprime të mëtejshme hetimore.
Meqenëse edhe dy ditë na ndajnë nga nata e ndërrimit të viteve, çfarë masash ka marrë policia Tiranës për festat e fundvitit?
Për festat e fundvitit është hartuar një plan-masash nga Drejtoria e Përgjithshme e Policisë së Shtetit, e cila është përcjellë në 12 Drejtoritë Vendore në vend. Meqenëse policia e Tiranës ka pjesën e “luanit” si në festime, organizime, apo kështu edhe në fluks njerëzisht, atëherë edhe numri i punonjësve të policisë do të jetë edhe më i madh. Plani ka hyrë në zbatim nga data 25 dhjetor dhe është i ndarë në 3 pika. Pika e parë lidhet me parandalimit e ngjarjeve kriminale që mund të ndodhin gjatë mbrëmjes së ndërrimit të viteve. Pika e dyta ka të bëjë me dislokimin e policisë së Rendit në vendet ku do të jetë i lartë përqendrimi i njerëzve si lokalet e natës, disko, pub-et, por edhe sheshet publike. Ndërsa pika e tretë, lidhet me Policinë Rrugore, e cila do të menaxhojë qarkullimin rrugor gjatë mbrëmjes së ndërrimit të viteve.
Masat
Të paktën 70 për qind e efektivëve të Policisë së Shtetit do të jenë në detyrë natën e ndërrimit të viteve. Drejtori i Përgjithshëm i Policisë, Haki Çako, ka nxjerrë një urdhër për të përforcuar masat në shkallë vendi, duke kaluar në gatishmëri të përforcuar. Për Policinë Rrugore, urdhri i nxjerrë detyron të gjithë efektivët që të jenë në detyrë në natën e ndërrimit të viteve. Policisë Rrugore i është kërkuar t’u vijë në ndihmë të gjithë përdoruesve të rrugës, në rast nevoje, dhe të kryejë kontrolle të rrepta për ata që do të drejtojnë mjetin në gjendje të dehur. Në urdhrin e drejtorit të Përgjithshëm thuhet se kërkohet marrja e masave në kufi, si dhe shtimi i sporteleve, duke eliminuar radhët. Numri një i Policisë së Shtetit u ka kërkuar patrullave të përgjithshme të intensifikojnë patrullimet e t’iu përgjigjen në kohë shqetësimeve të qytetarëve. Ndërkohë që strukturat kundër krimit të organizuar e krimeve të rënda, si dhe ato të krimit ekonomik duhet të jenë në detyrë për të parandaluar dhe goditur ndonjë veprimtari të mundshme të paligjshme, që mund të zhvillohet në pikat e kalimit apo në kufirin e gjelbër, duke përfituar nga fluksi apo nga ditët festive.
