Ditari nxit gjithmonë kuriozitetin e të tjerëve. Veçanërisht nëse ata që i shkruajnë janë njerëz të njohur. Por jo vetëm kaq. Ditarët shpesh u kanë dhënë historianëve një pasqyrë për të kaluarën. Shumë njerëz të njohur kanë dokumentuar ngjarje të kohës nëpërmjet rrëfimeve të jetës së tyre.
Ana Frank: Ndër më të famshmit është ditari i vajzës së re 14-vjeçare
Edhe pse Ana ishte 14 vjeç kur filloi të shkruante ditarin, ajo përshkruan sesi familja e saj hebrenje është fshehur për 2 vjet, deri në momentin që nazistët i gjetën dhe i dërguan në kamp përqendrimi. Me sugjerimin e disa miqve të tij, babai i Anas, i vetmi i mbijetuar nga familja, vendosi të botojë ditarin. Libri i përkthyer dhe i botuar në 70 gjuhë të botës, frymëzoi shumë filma, prodhime teatrale dhe një opera.
Virginia Woolf: Tregimi sesi merrnin jetë personazhet e saj
Ishte një tjetër grua që ka mbajtur një ndër ditarët më të lexuar dhe më të komentuar në botë. Shkrimtarja angleze pasi u martua me shkrimtarin Leonard Woolf ka dokumentuar çdo ditë ndjenjat e saj, sesi merrnin jetë personazhet dhe mbi të gjitha për depresionin dhe mënyrën si ndikonin në jetën e saj.
Merilyn Monroe: Ndihej gjithmonë e vetme
Një nga ditarët më të komentuar dhe më të pritur në të gjithë botën ka qenë ai i Merilyn Monroe. Femra që u kthye në burim frymëzimi për shumë, madje edhe në ditët e sotme. Jeta e saj ende është e rrethuar me mister, përfshirë edhe vdekjen e saj misterioze dhe raportet me ish-presidentin Kenedy.
Pas kërkimesh të gjata, shkrimtarja Anna Strasberg gjeti një arkiv sensacional të aktores me dy kuti, me shkrime ditari, letra dhe poema. Publikimi në librin “Fragmente”, hodhi një këndvështrim të ri për jetën e saj duke kënaqur fansat dhe duke i dhënë një përgjigje të gjithë armiqve të saj që kanë replikuar shumë histori. Ky ditar ofroi një pamje më të qartë të brendësisë së mendjes së saj. Merilin filloi t’i shkruante kujtimet e saj rreth vitit 1951 dhe shprehej se pavarësisht çfarë i ndodhte, ndihej gjithmonë e vetme, shkruan “Infoglobi”.
Lady Diana: Njerëzit e përfshirë në prodhimin e minave tokësore
5 vjet pasi çështja mbi vdekjen e Lady Dianës dhe Dodi Fayed u mbyll, dosja u rihap. Informacionet e reja u mbështetën mbi ditarin sekret të Lady Dianës. Diana kishte një ditar në të cilin ishin shkruar të dhëna për njerëz të përfshirë në prodhimin e minave tokësore. Të bazuar në shkrimet e saj u mbështet teza e vrasjes me paramendim. Jeta e saj dhe ky ditar frymëzuan edhe filmin “Diana”.
Michael Jackson: “Nëse nuk përqendrohem në film, nuk do të ketë pavdekshmëri”
Me gjetjen e ditarit sekret të yllit Michael Jackson është zbuluar se dëshira e madhe e tij ishte të shfaqej në ekranin e madh si aktor. Në këtë ditar, i cili u zbulua pas vdekjes së 50 vjeçarit, shkruhej “Nëse nuk përqendrohem në film, nuk do të ketë pavdekshmëri”. Ai besonte se në rolin e aktorit do të fitonte dhe do të shndërrohej në multi-bilionerin e parë aktor. Gjithashtu ai rrëfente se ishte i varur nga doktori i tij, sepse me pilulat që ai jepte, ylli i pop-it arrinte të flinte.
Kurt Cobain: Problemet në marrëdhënie me femra
Ditari i Kurt Cobain pohon gjëra që jo të gjithë do t’i pranonin. Në moshën 23 vjeçare ai pranonte problemet e tij në marrëdhënie me femrat dhe ka rrëfyer se si ka qenë viktimë e “bullizmit” në shkollën fillore. Kjo lidhej edhe me frikën që ai kishte për të prekur trupin e tij.
Britney Spears: Dyshonte se në flokë i kishin instaluar një element elektronik, “për përgjim”.
Një ndër ditarët që (s’)do duhej të ishte lexuar, është ai i Britney Spears. Aty ka përshkruar ditët e saj më të errëta. Ajo shkruante se dëgjonte zëra dhe mendonte se ne flokët e saj i kishin instaluar një element elektronik. Këngëtarja e njohur ka shkruar se zgjidhja që gjeti për “të hequr qafe”, ishte të qethte kokën e saj. Thuhet se në ditar Britney ka kërcënuar se do të vrasë fëmijët e saj.
Është e rëndësishme që ditari të mos bjerë në dorën e gabuar. Ndoshta jo të gjithë janë të ndërgjegjshëm se sa i rëndësishëm është ditari. Person publik, i njohur ose jo, ditari juaj mund të ofrojë një pasqyrë për jetën shumë vite më pas.
