Ashtu siç edhe ishte paralajmëruar, kryeministri Edi Rama ka gjymtuar Ministrinë e Zhvillimit Urban dhe Turizmit, e drejtuar nga Eglantina Gjermeni. Kështu, sektori i Turizmit nuk do të administrohet më nga ministrja e Zhvillimit Urban, Eglantina Gjermeni, por është bërë pjesë e Ministrisë së Zhvillimit Ekonomik, Tregtisë dhe Sipërmarrjes, që drejtohet nga Arben Ahmetaj. Presidenti Bujar Nishani ka bërë dekretimin e këtyre ndryshimeve dhe bashkë me to është bërë edhe ndryshimi i emërtimit të ministrive përkatëse. Në këtë mënyrë, Eglantina Gjermeni do të drejtojë Ministrinë e Zhvillimit Urban, ndërsa Ahmetaj Ministrinë e Zhvillimit Ekonomik, Turizmit, Tregtisë dhe Sipërmarrjes.
Ndryshimet janë dekretuar dje nga Presidenti Bujar Nishani. “Në mbështetje të neneve 93, 96 dhe 98 të Kushtetutës së Shqipërisë, me propozim të Kryeministrit, dekretoj: Në dekretin Nr.8304, datë 11.10.2013, “Për Emërimin e Këshillit të Ministrave”, bëhet këto ndryshime: Neni 1, në nenin 1, pikat 9 dhe 10 ndryshohen si më poshtë vijon: 9. Zonja Eglantina Gjermeni, ministër i Zhvillimit Urban, 10. Zoti Arben Ahmetaj, ministër i Zhvillimit Ekonomik, Turizmit,Tregtisë dhe Sipërmarrjes. Neni 2, ky dekret hyn në fuqi menjëherë”, shprehet Presidenti. “Në mbështetje të nenit 93 dhe 98, pika 1 të Kushtetutës, me propozim të Kryeministrit, dekretoj: Neni 1, Zonja Eglantina Gjermeni, emërohet ministër i Zhvillimit Urban. Neni 2, ky dekret hyn në fuqi menjëherë”, thuhet më tej në dekretin e kreut të shtetit. Presidenti ka bërë edhe dekretimin e ministrit Ahmetaj, për shkarkimin dhe më pas riemërimin e tij si ministër i Zhvillimit Ekonomik, Turizmit, Tregtisë dhe Sipërmarrjes. “Në mbështetje të nenit 93 dhe 98, pika 1 të Kushtetutës, me propozim të Kryeministrit, dekretoj: Neni 1, zoti Arben Ahmetaj, emërohet ministër i Zhvillimit Ekonomik, Turizmit, Tregtisë dhe Sipërmarrjes. Neni 2, ky dekret hyn në fuqi menjëherë”, vijohet më tej.
Arsyet e ndryshimeve
Ndryshimet në strukturën e qeverisë u diskutuan që në mbledhjen e Këshillit të Ministrave në datën 29 dhjetor 2014, ku u përfol për një kalim të Turizmit në varësi të ministrit Arben Ahmetaj. Në atë kohë u deklarua se qëllimi i kësaj lëvizje është se qeveria kërkon ta përfshijë turizmin si prioritet ekonomik dhe shihet e arsyeshme që ai të jetë pjesë e një ministrie që merret me tregtinë dhe sipërmarrjen. Flitet se do të ketë një bashkëpunim edhe me Kosovën për zhvillimin turistik të vendit. Duke qenë se gjatë viti të parë qeverisës turizmi nuk është se pati ndonjë ndryshim, qeveria bën lëvizjet e para për të rritur cilësinë e tij dhe për ta çuar në nivelet më të larta. Më herët ndryshimet në qeveri ndodhën në muajin gusht të vitit që lamë pas. Ilirian Celibashi dha dorëheqjen nga posti i ministrit për Marrëdhëniet me Parlamentin dhe këtë detyrë e mori Ermonela Felaj.
