Nisma e qeverisë “Mësues për Shqipërinë”, nis sot përmes testimit kombëtar të mësuesve nga i gjithë vendi. Kreu i qeverisë, Edi Rama, e cilëson këtë ditë si të shënuar në luftën kundër korrupsionit. Mijëra kandidatë do t’i nënshtrohen sot testit të hapur nga Ministria e Arsimit për rreth 2 mijë vende pune vakante, nëpër institucionet arsimore të vendit.
“Ditë e shënuar në luftën kundër korrupsionit dhe betejën për konkurrencën e lirë e meritën. Mbi 8.000 kandidatë për mësues në testim kombëtar”, shkuan Edi Rama në faqen e tij zyrtare në “Twitter”.
Kryeministri Rama bën me dije se përmes testimit të sotëm 2.765 mësues do të zëvendësohen për shkak të mosplotësimit të kritereve.
“Marrin fund emërimet e mësuesve me ryshfete! Përmes testimit të sotëm do zëvendësohen 2.765 mësuesit pa diplomë a jashtë profilit”, shkuan Rama.
Testi është i ndarë në 2 pjesë dhe do të ketë pyetje të përgjithshme. Gjithashtu një kriter i rëndësishëm do të jetë edhe drejtshkrimi i gjuhës shqipe dhe pyetjet rreth profilit.
Vlerësimi në total është 70 pikë dhe për të qenë kalues një kandidat duhet t’i përgjigjet saktë mbi 50% të pyetjeve.
Testi është organizuar këtë muaj sepse në janar do të hapen mbi 2 mijë vende vakante, pasi pritet të largohen mësuesit pa arsimin përkatës që rezultuan si të tillë nga inspektimet e bëra nga Ministria e Arsimit.
MAS: Kritere të forta mirëadministrimi dhe testimi
Kjo risi zbatohet në kuadër të vendosjes së një sistemi të ri që vendos kryefjalën tek cilësia, transparenca dhe meritokracia. Ministrja Nikolla u shpreh se korrupsionit i jepet përgjigjja e merituar me një sistem të shëndetshëm, i cili i kthen autoritetin mësuesit, duke aplikuar kritere të forta mireadministrimi dhe testimi.
“Ky është një sistem i ri rekrutimi në arsim, një sistem besoj, që rikthen meritën, por ajo që është e rëndësishme, e shëndetshme dhe argument i fortë kundër korrupsionit për emërimet në arsim”, tha Nikolla.
“Këtu është një kamera e gjithë institucionit. Këtu janë vendet ku janë aktualisht të gjithë mësuesit. Ata janë në kushtet e një sigurie dhe transparence të plotë, vëzhgimi të plotë. Këtu ka bllokues të zhurmuesve të celularit. Padyshim që celularët mungojnë. Nuk ka asnjë lidhje me internetin për të pasur një besueshmëri dhe siguri maksimale të operacionit të hartimit të tekstit dhe deri te çuarja në vendet e testimit. Ata do të dalin vetëm pasi të mbyllet procesi i testimit dhe të fillojë mbledhja e testeve në 29 qendrat e testimit”, shpjegoi ministrja Nikolla gjatë një vizite ditën e djeshme tek Agjencisë Kombëtare e Provimit.
Për të hartuar përmbajtjen e testit janë angazhuar pranë AKP-së 30 specialistë, vlerësues të certifikuar në profile të ndryshme, nga Agjencia Kombëtare e Provimeve, Instituti i Zhvillimit Arsimor dhe Inspektoriati Shtetëror i Arsimit. Këta specialistë janë ngujuar në një nga ambientet e kësaj agjencie dhe monitorohen rreptësisht nëpërmjet kamerave të sigurisë.
Ministrja Nikolla bëri të ditur se janë rreth 8.100 mësues që kanë plotësuar portalin, të cilët do të testohen në 12 qarqet e vendit, nga ora 10:00 deri në orën 11:00.
Ja ku do të kryhen testimet e mësuesve:
DAR Berat
1. Shkolla “B. D. Karbunara”
2. Shkolla “22 Tetori”
DAR Dibër
1. Shkolla “Sait Nejdeni”
DAR Durrës
1. Shkolla “Dom Nikoll Kacorri”
2. Shkolla “Bajram Curri 1”
DAR Elbasan
1. Shkolla “Dh. Todri”
2. Shkolla “K. Kristoforidhi”
3. Shkolla “A. Dakli”
4. Shkolla “L. Gurakuqi”
DAR Fier
1. Shkolla “Janaq Kilica”
2. Shkolla “Perikli Ikonomi”
DAR Gjirokastër
1. Shkolla “Koto Hoxhi”
2. Shkolla “Asim Zeneli”
DAR Korçë
1. Shkolla “Pandeli Cale”
2. Shkolla “R. Qirinxhi”
3. Shkolla “Th. Germenji”
DAR Kukës
1. Shkolla “H. Nelaj”
DAR Lezhë
1. Shkolla “Hydajet Lezha”
DAR Shkodër
1. Shkolla “28 Nëntori”
2. Shkolla “Shejnaze Juka”
DAR Tiranë Bashki
1. Shkolla “I. Qemali”
2. Shkolla “A. Z. Çajupi”
3. Shkolla “Partizani”
4. Shkolla “P. N. Luarasi”
5. Shkolla “S. Frasheri”
6. Shkolla “S. Tafaj”
DAR Tiranë Qark
1. Shkolla 9-vjeçare “Katund i Ri”
2. Shkolla “Sadik Stavileci”
DAR Vlorë
1. Shkolla “Ali Demi”
2. Shkolla “Halim Xhelo”
