Në Beograd sot janë bërë homazhe në nderim të jetës së ish-kryeministrit serb Zoran Gjingjiq, i cili u qëllua për vdekje në një vrasje politike në vitin 2003 – një vrasje prapavija politike e të ciliës ende nuk është sqaruar plotësisht.
Në atë që është bërë një ngjarje e përvitshme, të afërmit dhe miqtë e Gjingjiqit kanë vendosur lule te varri i tij dhe mijëra njerëz janë bashkuar në një “shëtitje për Zoranin” nëpër qendrën e qytetit.
Anëtarët e kabinetit që udhëhoqën vendin pas vrasjes së tij kanë vendosur gjithashtu kurora lulesh përpara ndërtesës së Qeverisë, dhe më pas Qeveria aktuale ka vënë kurora te pllaka përkujtimore e Gjingjiqit, në oborrin e ndërtesës së Qeverisë, ku ai u qëllua për vdekje.
Disa nga admiruesit e Gjingjiqit lanë mesazhe emocionale në faqen e tij zyrtare në “Facebook” të dielën.
“Një person i madh, ai ishte shpresa dhe drita, por dikush zgjodhi errësirën”, shkroi njëri.
“Katërmbëdhjetë vjet të humbura. Çdo gjë mund të ishte më ndryshe, por ne nuk e kemi kapur – siç do të thoshte Zorani – shansin historik për të qenë një vend modern, shtet evropian me sundim të ligjit”, tha një tjetër.
Gjingjiq ishte një nga themeluesit e Partisë Demokratike, e cila udhëhoqi një revoltë kundër regjimit të Slobodan Millosheviqit në tetor të vitit 2000.
Ai u bë kryeministër në vitin 2001 dhe ka luajtur një rol të rëndësishëm në arrestimin dhe ekstradimin e Millosheviqit në Gjykatën Ndërkombëtare të Krimeve për ish-Jugosllavinë në Hagë për t’u përballur me akuzat për krime lufte.
Ai u vra më 12 mars 2003, jashtë ndërtesës së Qeverisë në Beograd.
Milorad Ulemek, i njohur si “Legija”, ish-komandant i Njësisë së Operacioneve Speciale të Ministrisë së Brendshme, u shpall fajtor për organizimin e grupit që komplotuan vrasjen e Gjingjiqit.
Zvezdan Jovanoviq, i cili ishte në shërbim aktiv në atë njësi në kohën e vrasjes, u shpall fajtor për të shtënat që vranë atë.
Të dy burrat janë duke kryer dënimin me 40 vjet burg.
Pjesëtarët e Njësisë së Operacioneve Speciale të Ministrisë thuhet se kanë komplotuar për të kryer vrasjen me ndihmën e klanit të “Zemunit”, një bandë e krimit të organizuar, por prapavija politike për rastin ka mbetur e paqartë.
