Në ambientet e Ambasadës së Kosovës në Londër u mbajt koncerti festiv i fundvitit, para një audience të zgjedhur të mysafirëve të huaj dhe pjesëtarëve të komunitetit shqiptar në Londër.
Ambasadori Lirim Greiçevci falenderoi mysafirët për mbështetjen dhe miqësinë e tyre me Kosovën, duke uruar një vit të ri të gëzuar dhe të suksesshëm për të gjithë. Ai gjithashtu foli për kulturën dhe talentët e shumtë nga Kosova të cilët kanë fituar famë ndërkombëtare në muzikë, art, sport dhe në lëmi të tjera, duke përmendur ikonën kulturore të Kosovës, Rita Orën, e cila kishte marrë titullin “Ambasadore Nderi” po në sallën ku po mbahej koncerti festiv.
Dy muzikantë të talentuar nga Kosova, Yllka Istrefi, në piano, dhe Bardh Lepaja, në violinë, u paraqitën me pika të zgjedhura nga vepra kulmore të kompozitorëve të huaj si Bach, Mozart, Schumann, Rachmaninoff si dhe vendorë, Rafet Rudi, Dafina Zeqiri dhe Florent Shasivari.
Yllka Istrefi ka studiuar për piano në Universitetin e Prishtinës si dhe në Kolegjin Mbretëror të Muzikës në Londër. Ajo ka perfomuar në festivale dhe salla të shquara koncertale në Britani, SHBA, Itali, Maqedoni dhe Kosovë. Yllka është promotore e zellshme e kompozitorëve kosovarë dhe veprave të tyre.
Bardh Lepaja është violinist i ri i talentuar i cili aktualisht studion në shkollën e njohur private “Whitgift” në Londër. Rrugëtimi i Bardhit drejt kësaj shkolle nisi me vizitën e drejtorit të shkollës, Dr. Christopher Barnett dhe ekipit të tij, në Kosovë, për të përzgjedhur talentë të rinjë për Garën Ndërkombëtare të Muzikës në Whitgift. Bardhi la një përshtypje të jashtëzakonshme dhe u ftua që të marrë pjesë në gara në Londër. Me këtë rast, duke parë entuziazmin dhe ambiciet e Bardhit për të përsosur artin e lojës në violinë, drejtori Barnett i ndau një bursë të plotë për studime në këtë shkollë prestigjioze. Bardhi ka perfomuar në shumë koncerte dhe ngjarje muzikore ku ka fituar disa çmme dhe mirënjohje.
Ambasada e Kosovës në Londër synon që vitin e ardhshëm ta sjellë në Londër Filharmoninë e Kosovës për të performuar para publikut britanik, duke përçuar kështu vlerat më të lartë kulturore të cilat i ofron Kosova.
