Në ditën e gjashtë të operacionit u arrestuan 17 persona, ndërmjet të cilëve edhe pesë punonjës të OSHEE-së. Gjykata liron ish-drejtorin e Qytetit Studenti, Bujar Brovina, reagojnë PD dhe PS
Ka zgjatur 72 orë arresti me burg për ish-drejtorin e Qytetit Studenti, Bujar Brovina, i akuzuar për vjedhje të energjisë elektrike. Gjykata e Tiranës vendosi masën e sigurisë “detyrim paraqitjeje” për Brovinën, pavarësisht kërkesës së prokurorisë për arrest me burg pa afat. Ish-drejtori i Qytetit Studenti u arrestua tri ditë më parë, pasi punonjësit e OSHEE-së pretendojnë se gjatë kontrollit në ambientet në pronësi të tij u konstatuan tri lidhje të paligjshme të energjisë elektrike. Aksioni ka vijuar edhe në ditën e gjashtë, ku në pranga përveç abonentëve që kanë kryer vjedhje të energjisë kanë rënë edhe faturistë dhe elektricistë. Pesë punonjës të OSHEE-së u arrestuan në Tiranë dhe Korçë, si të dyshuar se kanë bashkëpunuar me subjektet private për lidhje të paligjshme të energjisë elektrike. Në operacionet masive të zhvilluara në të gjithë vendin, përveç drejtuesve të lartë të OSHEE-së kanë qenë të pranishme edhe forca të shumta të strukturave të rendit. Burime zyrtare të Policisë së Shtetit thanë se “në të gjithë vendin gjatë ditës së djeshme është marrë masa e arrestit në flagrancë ndaj 17 personave, të cilët akuzohen për vjedhje të energjisë elektrike dhe janë shpallur në kërkim shtatë të tjerë. Nga 17 të arrestuar, 12 prej tyre janë pronarë të bizneseve të ndryshme, por në ditët e kaluara ka pasur edhe abonentë familjarë, të cilët kanë përfunduar në prangat e policisë si të dyshuar për rilidhje në mënyrë të paligjshme të energjisë elektrike. Një pjesë e juristëve mendojnë se për këtë kategori, arresti me burg është një masë ekstreme dhe këta individë duhet të trajtohen në formë administrative si shkelës të kontratave dhe jo për veprën penale të vjedhjes. Në masat e shumta të sigurisë që po jepen në të gjithë vendin, shumica e përfaqësuesve të subjekteve private që janë kapur me lidhje të paligjshme janë lënë në arrest me burg pa afat, ose me afat 30-ditor, ndërsa abonentët familjarë kanë marrë masën e sigurisë “arrest shtëpiak” dhe “detyrim paraqitjeje”. Në lidhje me aksionin që është ende në vijim reagoi edhe Partia Demokratike, e cila ka kundërshtuar mënyrën sesi po zhvillohet ky operacion. Pretendimet e opozitës lidhen jo vetëm me selektimin që po bëhet gjatë ndërprerjeve të paligjshme të energjisë, por edhe me masat ekstreme dhe përfshirjen e punonjësve të rendit. Deputeti i PD-së, Keltis Kruja deklaroi se qytetari Bujar Brovina, prej 72 orësh u mbajt në arrest burgu pa asnjë provë ligjore.“Aksioni policesk i Edi Ramës do të kthehej patjetër në gjueti shtrigash dhe kështu ka ndodhur. Jemi para një rasti të pastër të linçimit që po i bëhet qytetarit Bujar Brovina, i cili prej 72 orësh mbahet në arrest burgu pa asnjë provë ligjore”. Ndërsa nga ana e tij, Operatori i Shpërndarjes së Energjisë Elektrike pretendon se Brovina ka pasur tri lidhje të paligjshme që furnizonin ambientet në pronësi të tij. Sipas OSHEE-së, në të gjithë vendin janë identifikuar mijëra raste me lidhje të paligjshme, ndërkohë që janë marrë hapa ligjorë për rastet e abuzimit. Ndërkohë, deputeti Eduard Halimi u shpreh: “Sot Rama lajmëroi se ishte i lumtur me gjykatat, pasi ato kishin lënë në burg të akuzuarit prej tij dhe po lëvizkan në drejtimin e duhur!! Para disa ditësh, në Kuvend tha se Gjykatat Administrative po e merrnin në qafë shtetin se po mbanin anën e qytetarëve dhe jo të qeverisë”. Tashmë duket se ky operacion i nisur me shumë bujë nuk është vetëm një betejë ligjore, pasi pozita dhe opozita kanë qëndrime të kundërta. Gjithsesi, sikurse është njoftuar nga OSSHE, puna për shkëputjen e energjisë elektrike do të vijojë në të gjithë vendin.
