Në seancën plenare të ditës së enjte, Grupi Parlamentar i PSsë pritet të zbatojë propozimin e Komisionit Hetimor Parlamentar për shkarkimin e Nënkryetarit të Këshillit të Lartë të Drejtësisë Elvis Çefa dhe të anëtarit Lulzim Lelçaj. Ky është vendimi i ndërmarrë në mënyrë unanime nga grupi parlamentar i Partisë Socialiste.
Raporti i përpiluar ditën e shtunë nga Komisioni Hetimor i propozon Kuvendit shkarkimin e Çefës dhe Lelçajt për shkelje kushtetuese dhe ligjore gjatë veprimtarisë së tyre në këtë institucion. Në mbledhjen e djeshme të grupit të PS-së, e drejtuar nga kreu i grupit parlamentar Gramoz Ruçi, socialistët për rreth një orë kanë dëgjuar nga kreu i Komisionit Hetimor, Armando Subashi për shkeljet e zbuluara në hetimin e KLD-së dhe më pas kanë rënë dakort për votimin pro shkarkimit të tyre.
Gjithashtu një çështje tjetër diskutimi e ngritur nga deputetët e PS-së, ka qenë ajo për miratimin e kandidaturës së Arjan Salatit si anëtar të Bordit Drejtues të Autoritetit të Mbikëqyrjes Financiare. Burime nga kjo mbledhje pohuan për gazetën “Shekulli” se deputetët socialistë dëgjuan një shpjegim të detajuar nga kreu i Komisionit Hetimor Parlamentar, Armando Subashi. Subashi gjatë shpjegimit të pikave se ku janë konstatuar shkelje nga ana e KLD-së dhe anëtarëve të saj ka deklaruar se “tashmë është e provuar se KLD-ja ndodhet jashtë çdo binari kushtetues dhe ligjor”.
Sipas Subashit, veprimtaria e KLD-së për promovimin e anëtareve të saj është në kundërshtim të parimit kushtetues. “Në punën tonë i jemi përmbajtur atyre pikave të kërkuara nga grupi i deputetëve që kërkoi ngritjen e komisionit hetimor. Veprimtaria e KLD-së me promovimin e anëtarëve të saj është në kundërshtim të parimit kushtetues”, tha Subashi.
Ai theksoi se një tjetër shkelje e Këshillit të Lartë të Drejtësisë është edhe që merret me emërimin e magjistratëve të rinj nëpër gjykata. Sipas Subashit, Magjistratët që kanë përfunduar shkollën në 2014 vijojnë të jenë ende pa u emëruar. Më tej Subashi mësohet të ketë thënë se “vendimet e marra nga KLD-ja janë tërësisht politike dhe nepotike”. Sakaq kreu i Komisionit Hetimor, Subashi është ndalur edhe në rolin e Presidentit të Republikës Bujar Nishani njëherazi edhe kreu KLD-së duke e bërë përgjegjës për shkeljet e ndodhura në KLD.
